ചെറുതുരുത്തി: പള്ളം പാടശേഖരത്ത് സ്വകാര്യ വ്യക്തിയുടെ നേതൃത്വത്തില്‍ നടന്ന നിര്‍മാണ പ്രവര്‍ത്തനങ്ങള്‍ പരിശോധിക്കാന്‍ ജില്ലാ കൃഷി ഓഫിസില്‍ നിന്നുള്ള ഉദ്യോഗസ്ഥരോടൊപ്പം എത്തിയ പഞ്ചായത്ത് മെംബറെ മര്‍ദിച്ചതായി പരാതി. വള്ളത്തോള്‍ നഗര്‍ പഞ്ചായത്തിലെ ഒന്നാം വാര്‍ഡ് മെംബര്‍ പള്ളം ഇടശ്ശേരി വീട്ടില്‍ അലി(35)ക്കാണ് മര്‍ദനമേറ്റത്. ഇദ്ദേഹത്തെ ചേലക്കരയിലെ ആശുപത്രിയില്‍ പ്രവേശിപ്പിച്ചു. ഇന്നലെയാണ് സംഭവം. സ്വകാര്യ വ്യക്തി പള്ളം പാടശേഖരത്തില്‍ നിര്‍മിച്ച മോട്ടോര്‍ പുര പൊളിച്ച് മാറ്റണമെന്ന് നേരത്തെ പഞ്ചായത്ത് നിര്‍ദേശം നല്‍കിയിരുന്നു. ഇത് പാലിക്കാതിരുന്നതിനെ തുടര്‍ന്നാണ് കൃഷി വകുപ്പ് ഉദ്യോഗസ്ഥര്‍ റിപ്പോര്‍ട്ട് തയാറാക്കാന്‍ സ്ഥലം സന്ദര്‍ശിച്ചത്.   പരിസ്ഥിതി പ്രവര്‍ത്തകന്‍ രാമചന്ദ്രന്റെ നേതൃത്വത്തിലാണ് തന്നെ ആക്രമിച്ചതെന്ന് അലി പറഞ്ഞു.