കാസര്‍കോട്: പ്രളയ ദുരന്തത്തിന് ഇരയായവരേയും സാലറി ചലഞ്ചില്‍ ഉള്‍പ്പെടുത്തിയത് ജീവനക്കാരില്‍ അമര്‍ഷത്തിനിടയാക്കുന്നു. കേരളത്തിലുണ്ടായ പ്രളയ ദുരന്തത്തില്‍പ്പെട്ടവരെ സഹായിക്കാനെന്ന പേരില്‍ സര്‍ക്കാര്‍ ഏര്‍പ്പെടുത്തിയ സാലറി ചലഞ്ചുമായി ബന്ധപ്പെട്ട് ഉദ്യോഗസ്ഥരില്‍ സമ്മിശ്ര പ്രതികരണം നിലനില്‍ക്കുന്നതിനിടയിലാണ് പ്രളയ ദുരന്തത്തിന് ഇരയായ സര്‍ക്കാര്‍ ജീവനക്കാരിയോടും ഉന്നത ഉദ്യോഗസ്ഥര്‍ സാലറി ചലഞ്ച് ചെയ്യാന്‍ സമ്മര്‍ദം ചെലുത്തിയത്.
ഒരു മാസത്തെ ശമ്പളം മുഴുവന്‍ ദുരിതാശ്വാസ നിധിയിലേക്ക് അടക്കണമെന്ന സര്‍ക്കാര്‍ നിര്‍ദേശം ജീവനക്കാരില്‍ കടുത്ത അമര്‍ഷം ഉണ്ടാക്കിയിട്ടുണ്ടെങ്കിലും ഇത് തുറന്നു പറയാന്‍ ഉദ്യോഗസ്ഥര്‍ വിമുഖത കാട്ടുകയാണ്. അതിനിടയിലാണ് ഇതര ജില്ലയിലെ ഒരു സര്‍ക്കാര്‍ ഉദ്യോഗസ്ഥക്കും സാലറിചലഞ്ചിന്റെ 'കെണി'വീണത്. പ്രളയ ദുരന്തത്തിനിരയായ ഇവര്‍ക്ക് സ്വന്തം വീട് താമസയോഗ്യമാക്കാന്‍ മാത്രം ചെലവായത് അഞ്ചു ലക്ഷം രൂപയാണ്. ഇനി സാലറി ചലഞ്ച് കൂടിയായാല്‍ താനും കുടുംബവും ഒരു മാസം പട്ടിണി കിടക്കേണ്ടി വരുമെന്ന് ഇവര്‍ പറയുന്നു.
അതേ സമയം സാലറി ചലഞ്ച് നടത്തുന്നതിന് വേണ്ടി വിവിധ വകുപ്പുകളില്‍ ഉള്‍പ്പെടുത്തി ലോണ്‍ തരപ്പെടുത്തി തരാമെന്ന വാഗ്ദാനവും ഉദ്യോഗസ്ഥരുടെ ഭാഗത്തുനിന്നുണ്ടായെങ്കിലും അവര്‍ തയാറായിട്ടില്ല. പ്രളയ ദുരന്തത്തില്‍പ്പെട്ട ഇവര്‍ക്ക് സര്‍ക്കാര്‍ സഹായം നല്‍കേണ്ടതിനു സാലറി ചലഞ്ചിന് നിര്‍ബന്ധിക്കുന്നത് അനീതിയാണെന്ന് ജീവനക്കാര്‍തന്നെ പറയുന്നു.
ഇത് പോലെ ഒട്ടനവധി ഉദ്യോഗസ്ഥര്‍ തങ്ങളുടെ പ്രയാസങ്ങള്‍ പലര്‍ക്ക് മുന്നിലും പറയുന്നുണ്ടെങ്കിലും ഇത്തരം കാര്യങ്ങള്‍ ബന്ധപ്പെട്ട അധികാരികളുടെ ശ്രദ്ധയില്‍പ്പെടുത്താന്‍ ആര്‍ക്കും സാധിക്കുന്നില്ല.
അവരവര്‍ക്കു കഴിയുന്ന തരത്തില്‍ ദുരിത ബാധിതരെ സഹായിക്കാന്‍ ആവശ്യപ്പെടാമെന്നല്ലാതെ ഒരു മാസത്തെ ശമ്പളം മുഴുവന്‍ ദുരിതാശ്വാസ നിധിയിലേക്ക് അടക്കണമെന്ന് സര്‍ക്കാര്‍ നിര്‍ദേശിക്കുന്നത് അംഗീകരിക്കാന്‍ ജീവനക്കാര്‍ക്കാവുന്നില്ല.
ഒരു ദിവസം മുതല്‍ 10 ദിവസം വരെയുള്ള ശമ്പളം സാലറി ചലഞ്ചിലേക്കു അടക്കാമെന്ന ആഗ്രഹം ഭൂരിഭാഗം ഉദ്യോഗസ്ഥരിലും ഉണ്ടെങ്കിലും ഇത് എങ്ങിനെ സാധിക്കുമെന്ന ചോദ്യത്തിന് ജീവനക്കാര്‍ക്ക് ഉത്തരമില്ല.
അതിനിടെ സാലറി ചലഞ്ചിന് സമ്മതം നല്‍കാത്ത ജീവനക്കാര്‍ക്കെതിരേ പ്രതികാര നടപടികള്‍ സ്വീകരിക്കുന്നെന്ന ആക്ഷേപങ്ങളും ചില കോണുകളില്‍ നിന്നും ഉയരുന്നുണ്ട്.