ബെയ്ജിങ്: ഒളിംപിക് ടീമിനെതിരേ അക്രമമുണ്ടായ സാഹചര്യത്തില്‍ ഒളിംപിക്‌സിനായി റിയോയിലെത്തുന്ന ചൈനക്കാര്‍ക്ക് സര്‍ക്കാരിന്റെ മുന്നറിയിപ്പ്. അക്രമ സാധ്യതയുള്ള ബ്രസീലിലെ പ്രദേശങ്ങളിലേക്ക് പോകുന്നത് ചൈനീസ് സന്ദര്‍ശകര്‍ ഒഴിവാക്കണമെന്നാണ് ചൈനയുടെ മുന്നറിയിപ്പ്.
ബ്രസീലില്‍ മോഷണങ്ങളും കൊലപാതകങ്ങളും വര്‍ധിച്ചു വരികയാണ്. ഈ സാഹചര്യത്തില്‍ ചൈനീസ് സന്ദര്‍ശകര്‍ അതീവ ജാഗ്രത പുലര്‍ത്തണം. ആഢംബര വസ്തുക്കള്‍ പുറത്തേക്ക് പോകുമ്പോള്‍ കൈയിലെടുക്കരുത്. ബാഗുകള്‍ ഉപയോഗിക്കുകയോ നടന്നു കൊണ്ട് മൊബൈല്‍ ഫോണില്‍ സംസാരിക്കുകയോ ചെയ്യരുത്. ഇത് നിങ്ങളെ അപകടത്തില്‍ ചാടിക്കുമെന്നും സര്‍ക്കാര്‍ പ്രസ്താവനയില്‍ വ്യക്തമാക്കി. അതേസമയം അപരിചിതരുമായി തര്‍ക്കത്തില്‍ ഏര്‍പ്പെടുത്തരുതെന്നും സര്‍ക്കാര്‍ പറഞ്ഞു. ചൈനീസ് ഒളിംപിക് സംഘത്തില്‍ 711 പേരാണ് ഉള്ളത്.