കൊച്ചി: കൊച്ചിയിലെ സി.പി.എമ്മിലെ പ്രമുഖ എം.സി ജോസഫൈന് ഇനി നിയോഗം സംസ്ഥാനത്തെ വനിതകളുടെ പ്രശ്‌നങ്ങള്‍ തീര്‍പ്പുകല്‍പ്പിക്കാന്‍. സി.പി.എം കേന്ദ്രകമ്മിറ്റി അംഗം എം.സി ജോസഫൈനെ സംസ്ഥാന വനിതാകമ്മിഷന്‍ അധ്യക്ഷയായി തെരഞ്ഞെടുത്തു.
വൈപ്പിന്‍ സ്വദേശിനിയായ 68കാരിയായ ജോസഫൈന്‍ എറണാകുളം മഹാരാജാസ് കോളജില്‍നിന്ന് മലയാള ഭാഷയില്‍ ബിരുദാനന്തരബിരുദം നേടി. ജി.സി.ഡി.എ. ചെയര്‍പേഴ്‌സനും വനിതാ വികസന കോര്‍പറേഷന്‍ ചെയര്‍പേഴ്‌സനും അങ്കമാലി നഗരസഭാ കൗണ്‍സിലറുമായിരുന്നു. അഖിലേന്ത്യാ ജനാധിപത്യ മഹിളാ അസോസിയേഷന്‍ അഖിലേന്ത്യാ വൈസ് പ്രസിഡന്റാണു നിലവില്‍.
ഇടുക്കിയില്‍നിന്ന് ലോകസഭയിലേക്കും അങ്കമാലി, കൊച്ചി എന്നിവിടങ്ങളില്‍നിന്നു നിയമസഭയിലേക്കും മത്സരിച്ചിട്ടുണ്ട്. ട്രേഡ്‌യൂനിയന്‍ പ്രവര്‍ത്തകനായ പി എ മത്തായിയാണു ഭര്‍ത്താവ്. മകന്‍: മനു പി മത്തായി. മരുമകള്‍: ജ്യോത്‌സന.