സ്‌കോപ്‌ജെ: രാജ്യത്തിന്റെ പേരു മാറ്റാനായി തെക്കുകിഴക്കന്‍ യൂറോപ്യന്‍ രാജ്യമായ മാസിഡോണിയയില്‍ ജനഹിത പരിശോധന നടന്നു. പഴയ യൂഗോസ്ലാവ് റിപബ്ലിക്കായ മാസിഡോണിയയുടെ പേര് നോര്‍ത്ത് മാസിഡോണിയയാക്കാനാണ് വോട്ടെടുപ്പ് നടക്കുന്നത്. അതിര്‍ത്തിരാജ്യമായ ഗ്രീസുമായി പതിറ്റാണ്ടുകളായി തുടരുന്ന തര്‍ക്കം പരിഹരിച്ച് യൂറോപ്യന്‍ യൂനിയനിലേക്കുള്ള പ്രവേശനം എളുപ്പമാക്കുന്നതിന്റെ ഭാഗമായാണു പുതിയ നീക്കം.
മാസിഡോണിയയ്ക്കും ഗ്രീസിനുമിടയിലുണ്ടായ ധാരണയെ അംഗീകരിച്ച് യൂറോപ്യന്‍ യൂനിയന്‍, നാറ്റോ അംഗത്വം സ്വന്തമാക്കുന്നതിനെ താങ്കള്‍ പിന്തുണക്കുന്നോ എന്നാണു ജനഹിത പരിശോധന ഉയര്‍ത്തുന്ന ചോദ്യം. റിപബ്ലിക്ക് ഓഫ് മാസിഡോണിയ എന്നത് നോര്‍ത്ത് മാസിഡോണിയ എന്നാക്കി പുനര്‍നാമകരണം നടത്താനാണു ഇരുരാജ്യങ്ങള്‍ക്കുമിടയില്‍ ധാരണയായിരുന്നത്.
1991ലാണു പഴയ യൂഗോസ്ലാവിയയുടെ ഭാഗമായിരുന്ന മാസിഡോണിയ സ്വതന്ത്ര രാജ്യമായി പ്രഖ്യാപിക്കപ്പെട്ടത്. എന്നാല്‍, തങ്ങളുടെ പ്രദേശത്തിന്റെ നാമമാണ് വടക്കന്‍ അയല്‍ക്കാരായ പുതിയ രാജ്യം സ്വീകരിച്ചിരിക്കുന്നതെന്ന വാദവുമായി ഗ്രീസ് രംഗത്തെത്തി. പ്രാചീന റോമന്‍ സാമ്രാജ്യത്തിന്റെ ഭാഗമായ മാസിഡോണിയയുടെ രണ്ടുഭാഗങ്ങളാണു പുതിയ മാസിഡോണിയയും ഗ്രീസിലെ പൂര്‍വ മാസിഡോണിയയും. ഇരുദേശങ്ങളും അലക്‌സാണ്ടര്‍ ചക്രവര്‍ത്തിയുടെ പൈതൃകം അവകാശപ്പെടുന്നുണ്ട്. തര്‍ക്കത്തെ തുടര്‍ന്ന് മാസിഡോണിയയുടെ നാറ്റോ-ഇ.യു പ്രവേശത്തെ ഗ്രീസ് വീറ്റോ ചെയ്തിരിക്കുകയാണ്. ഗ്രീസിന്റെ എതിര്‍പ്പിനെ തുടര്‍ന്ന് യു.എന്‍ അടക്കമുള്ള ചില അന്താരാഷ്ട്ര സംഘടനകള്‍ മാസിഡോണിയയെ മുന്‍ യൂഗോസ്ലാവ് റിപബ്ലിക്ക് ഓഫ് മാസിഡോണിയ എന്നാണു സൂചിപ്പിക്കാറ്.
തര്‍ക്കത്തിനു പരിഹാരമായി രാജ്യത്തിന്റെ പേരില്‍ നോര്‍ത്ത് എന്നു കൂടി ചേര്‍ക്കണമെന്ന തീരുമാനത്തിലെത്തുകയായിരുന്നു. ഗ്രീസിനെ ഭയന്നല്ല പേരുമാറ്റുന്നതെന്നും ഇ.യു, നാറ്റോ പോലുള്ള അന്താരാഷ്ട്ര സംഘങ്ങളില്‍ കയറി രാജ്യത്തിന്റെ ഭാവി ഭദ്രമാക്കുന്നതിന്റെ ഭാഗമായാണെന്നും മാസിഡോണിയന്‍ പ്രധാനമന്ത്രി സൊറാന്‍ സേവ് പറഞ്ഞു.