കാബൂള്‍: അഫ്ഗാനിസ്ഥാന്‍ ക്രിക്കറ്റ് ടീമില്‍ മാറ്റങ്ങള്‍ തുടരുന്നു. ലോകകപ്പിലെ മോശം പ്രകടനത്തിന് പിന്നാലെ ഗുല്‍ബാദിന്‍ നെയ്ബിനെ നായകസ്ഥാനത്തുനിന്ന് നീക്കിയ അഫ്ഗാന്‍ ക്രിക്കറ്റ് ബോര്‍ഡ് യുവ സ്പിന്നര്‍ റാഷിദ് ഖാനെ ക്യാപ്റ്റനായി നിയമിച്ചതാണ് പുതിയ നീക്കം. മൂന്ന് വിഭാഗത്തിലും ഇനി റാഷിദ് തന്നെയായിരിക്കും നയിക്കുക. ലോകകപ്പിന് തൊട്ടുമുമ്പ് ക്യാപ്റ്റനെ മാറ്റി അഫ്ഗാന്‍ ക്രിക്കറ്റ് ബോര്‍ഡ് വിവാദത്തില്‍ ഇടം പിടിച്ചിരുന്നു. അസ്‌കര്‍ അഫ്ഗാനെ ക്യാപ്റ്റന്‍ സ്ഥാനത്തുനിന്ന് നീക്കി പകരം ഏകദിനത്തില്‍ ഗുല്‍ബാദിന്‍ നയ്ബിനെയും ടെസ്റ്റില്‍ റഹ്മത്ത് ഷായേയും ട്വന്റി20യല്‍ റാഷിദിനെയും നിയമിച്ച ബോര്‍ഡിന്റെ തീരുമാനം നേരത്തെ വിവാദമായിരുന്നു. ഇതിനെ തുടര്‍ന്നാണ് ക്രിക്കറ്റ് ബോര്‍ഡിന്റെ പുതിയ നീക്കം.
20കാരനായ റാഷിദ് ഖാന്‍ ര@ണ്ട് ടെസ്റ്റുകളില്‍നിന്ന് ഒന്‍പത് വിക്കറ്റും 67 ഏകദിനങ്ങളില്‍ നിന്ന് 131 വിക്കറ്റും 38 ട്വന്റി20യില്‍ നിന്ന് 75 വിക്കറ്റും നേടിയിട്ടുണ്ട്. ഐ.പി.എല്ലിലും മികച്ച പ്രകടനം നടത്തുന്ന റാഷിദ് ഖാന്‍ നായക സ്ഥാനത്തെത്തുന്നതോടെ കാര്യമായ മാറ്റം ഉണ്ടാകുമെന്ന് പ്രതീക്ഷിക്കാം.