ന്യൂഡല്‍ഹി: കേന്ദ്രസര്‍ക്കാര്‍ പാസാക്കിയ, കാര്‍ഷിക മേഖലെയ തകര്‍ക്കുന്ന മൂന്നു നിയമങ്ങള്‍ പിന്‍ വലിക്കണമെന്നാവശ്യപ്പെട്ട് കര്‍ഷകര്‍ സുപ്രിം കോടതിയില്‍ ഹരജി ഫയല്‍ ചെയ്തു. ഭാരതീയ കിസാന്‍ യൂനിയനാണ് സുപ്രീംകോടതിയില്‍ ഹരജി നല്‍കിയിരിക്കുന്നത്. കേന്ദ്രസര്‍ക്കാരിന്റെ പുതിയ മൂന്ന് കാര്‍ഷിക നിയമങ്ങളും കാര്‍ഷിക മേഖലയെ തകര്‍ക്കുമെന്നും ഭാരതീയ കിസാന്‍ യൂനിയന്‍ പ്രസിഡന്റ് ഭാനു പ്രതാപ് സിങ് ഹരജിയില്‍ പറയുന്നു. കാര്‍ഷി മേഖലയെ കോര്‍പറേറ്റുകള്‍ക്ക് തീരെഴുതിക്കൊടുക്കന്നതാണ് നിയമമെന്നും കര്‍ഷകര്‍ ഹരജിയില്‍ ചൂണ്ടിക്കാട്ടി. വേണ്ടത്ര ചര്‍ച്ചകള്‍ നടത്താതെയാണ് നിയമം പാസാക്കിയിതെന്നും ഹരജിയില്‍ പറയുന്നുണ്ട്. നിമത്തിനെതിരേ വിവിധ കക്ഷികള്‍ നല്‍കിയ ഹരജിയില്‍ സുപ്രിം കോടതി നേരത്തെ തന്നെ സര്‍ക്കാരിന് നോട്ടീസ് അയച്ചിരുന്നു.

അതേസമയം, കര്‍ഷക പ്രതിഷേധം നാള്‍ക്കുനാള്‍ ശക്തിപ്പെട്ടുവരുമ്പോഴും നിയമം പിന്‍വലിക്കില്ലെന്ന പിടിവാശിയിലാണ് കേന്ദ്രസര്‍ക്കാര്‍. കര്‍ഷകരുമായി ചര്‍ച്ച ചെയ്യാന്‍ തയാറാണെന്നും ഒരു നിയമവും പൂര്‍ണമായി കര്‍ഷകരെ ബാധിക്കുന്നതല്ലെന്നുമാണ് കാര്‍ഷിക മന്ത്രി നരേന്ദ്ര സിങ് തോമര്‍ വ്യാവാഴ്ച പറഞ്ഞത്. കര്‍ഷകര്‍ക്ക് ബുദ്ധിമുട്ടുണ്ടെന്ന് പറയുന്ന ഭേദഗതി മാത്രം ചര്‍ച്ചയ്‌ക്കെടുക്കാമെന്നാണ് തോമര്‍ പറഞ്ഞിരിക്കുന്നത്.

അതേസമയം, കാര്‍ഷിക മേഖലയുമായി ബന്ധപ്പെട്ട മൂന്ന് നിയമങ്ങള്‍ നടപ്പാക്കുന്നതിന് മുമ്പ് നിങ്ങള്‍ എന്തുകൊണ്ടാണ് കര്‍ഷകരോട് ആലോചിക്കാത്തതെന്ന് തങ്ങള്‍ അമിത് ഷായോട് ചോദിച്ചപ്പോള്‍ ചില തെറ്റുകള്‍ സംഭവിച്ചതായി അമിത് ഷാ സമ്മതിച്ചെന്ന് കര്‍ഷക സംഘ നേതാവ് ശിവ് കുമാര്‍ കാക്ക പറഞ്ഞിരുന്നു. കാര്‍ഷിക നിയമം പിന്‍വലിക്കുന്നതുവരെ പോരാട്ടം തുടരുമെന്ന് കര്‍ഷകര്‍ ഉറപ്പിച്ച് പറഞ്ഞിട്ടുണ്ട്. പ്രതിഷേധം കൂടുതല്‍ ശക്തിപ്പെടുത്താനാണ് കര്‍ഷകരുടെ തീരുമാനം.