ചെറുവത്തൂര്‍: കുറുക്കന്‍മാരെ കണ്ടു ഭയന്നോടിയ പുള്ളിമാന്‍ പുഴയില്‍ മുങ്ങി ചത്തു. ചെറുവത്തൂര്‍ അച്ചാംതുരുത്തിയിലാണ് പുള്ളിമാന്‍ കുഞ്ഞിന്റെ ദാരുണാന്ത്യം. വ്യാഴാഴ്ച വൈകീട്ട് മൂന്നോടെയാണ് ഓര്‍ക്കുളം പ്രദേശത്ത് കുറുക്കന്മാര്‍ ഓടിക്കുകയായിരുന്ന പുള്ളിമാനെ കുട്ടികള്‍ കണ്ടത്. ഇതിനെ രക്ഷിക്കാനായി കുട്ടികള്‍ ഓടിയെത്തുമ്പോഴേക്കും മാന്‍ പുഴയിലേക്കു ചാടി.
അച്ചാംതുരുത്തിയിലേക്കു നീന്തിക്കയറാന്‍ ശ്രമിച്ചുവെങ്കിലും ഓടിത്തളര്‍ന്ന മാന്‍ നന്നേ ക്ഷീണിച്ചിരുന്നു. പ്രദേശവാസികള്‍ മാനിനെ കരയ്‌ക്കെത്തിക്കാന്‍ ശ്രമിച്ചു. ഏറെനേരം നീണ്ട പരിശ്രമത്തിനൊടുവില്‍ നാട്ടുകാര്‍ പുള്ളിമാനെ കരയ്‌ക്കെത്തിച്ചുവെങ്കിലും അപ്പോഴേക്കും ചത്തിരുന്നു.
വിവരമറിഞ്ഞു വനം വകുപ്പ് ഉദ്യോഗസ്ഥരും സ്ഥലത്തെത്തി. തെക്കേമാട് വച്ചുതന്നെ പോസ്റ്റ്‌മോര്‍ട്ടം നടത്തി. ഈ പ്രദേശങ്ങളില്‍ ഇതിനു മുന്‍പ് പുള്ളിമാനെ ആരും കണ്ടിട്ടില്ല.
മലയോര പ്രദേശത്ത് നിന്നു തേജസ്വിനി പുഴയിലൂടെയാകും മാന്‍ എത്തിയതെന്ന് കരുതുന്നു.