കൊച്ചി: യാത്രക്കാര്‍ക്കു നല്‍കുന്ന സേവനത്തിന്റെ അടിസ്ഥാനത്തില്‍ കൊച്ചി വിമാനത്താവളത്തിന് അംഗീകാരം. വിമാനത്താവള ഓപറേറ്റര്‍മാരുടെ അന്താരാഷ്ട്ര സംഘടനയായ എയര്‍പോര്‍ട്ട് കൗണ്‍സില്‍ ഇന്റര്‍നാഷനലിന്റെ (എ.സി.ഐ) അംഗീകാരമാണ് കൊച്ചിക്കു ലഭിച്ചത്.
പ്രതിവര്‍ഷം 50 ലക്ഷത്തിനും ഒന്നര കോടിക്കുമിടയില്‍ യാത്രക്കാരെത്തുന്ന വിമാനത്താവളങ്ങളുടെ വിഭാഗത്തില്‍ മൂന്നാം സ്ഥാനമാണ് കൊച്ചിക്കു ലഭിച്ചത്. ഈ വിഭാഗത്തില്‍ ഒന്നാമതെത്തിയത് ഹൈദരാബാദ് വിമാനത്താവളമാണ്. ചൈനയിലെ ഹോഹോത്ത്, ഇന്തോനേഷ്യയിലെ ബലിക്പാപന്‍ വിമാനത്താവളങ്ങള്‍ രണ്ടാം സ്ഥാനം പങ്കിട്ടു.
കാനഡയിലെ ഹാലിഫാക്‌സില്‍ നടന്ന ചടങ്ങില്‍ എ.സി.ഐ ഡയരക്ടര്‍ ജനറല്‍ എയ്ഞ്ചല ഗിട്ടെന്‍സില്‍നിന്നു സിയാല്‍ ഓപറേഷന്‍സ് സീനിയര്‍ മാനേജര്‍ ജി. മനു എ.സി.ഐ എയര്‍പോര്‍ട്ട് സര്‍വിസ് ക്വാളിറ്റി പുരസ്‌കാരം ഏറ്റുവാങ്ങി.