സ്വന്തം ലേഖകന്‍ 

തിരുവനന്തപുരം: നന്ദിയുണ്ട് സാറേ... ഒത്തിരി നന്ദിയുണ്ട്... വലിയതുറ ദുരിതാശ്വാസ ക്യാംപിലെ ജസീന്ത വലിയ സന്തോഷത്തിലാണ്. വര്‍ഷങ്ങളായുള്ള കാത്തിരിപ്പിനൊടുവില്‍ തന്റെ റേഷന്‍ കാര്‍ഡ് മുന്‍ഗണനാ വിഭാഗത്തിലേക്ക് മാറ്റിക്കിട്ടിയതിന്റെ ആഹ്ലാദമാണ് മുഖത്ത്. ദുരിതാശ്വാസ കാംപിലുള്ള ഇവര്‍ക്ക് എ.പി.എല്‍ (വെള്ള റേഷന്‍ കാര്‍ഡ്) കാര്‍ഡനുവദിച്ചത് സംബന്ധിച്ച് സുപ്രഭാതം ഡിസംബര്‍ ഒന്‍പതിന് വാര്‍ത്ത നല്‍കിയിരുന്നു. വാര്‍ത്ത വന്ന് ഒരുദിവസത്തിനകം മുന്‍ഗണനാ വിഭാഗത്തിലേക്ക് ഇവരുടെ കാര്‍ഡ് മാറ്റിക്കിട്ടി.

കഴിഞ്ഞ 10ന് രാവിലെ റേഷന്‍ കടയില്‍ നിന്ന് വിളിച്ചിരുന്നതായി ജസീന്ത സുപ്രഭാതത്തോട് പറഞ്ഞു. 'കടയിലെത്തിയപ്പോള്‍ നിലവിലുള്ള കാര്‍ഡ് പി.എച്ച്.എച്ച് വിഭാഗത്തിലേക്ക് മാറ്റിയതായി കടയുടമ പറഞ്ഞു. കാര്‍ഡില്‍ പി.എച്ച്.എച്ച് (മുന്‍ഗണനാ വിഭാഗം) എന്ന് എഴുതിയും നല്‍കി. ഉച്ചയോടെ റേഷന്‍ ഇന്‍സ്‌പെക്ടറും കാംപിലെത്തി മുന്‍ഗണനാ വിഭാഗത്തിലേക്ക് കാര്‍ഡ് മാറ്റിയതായി അറിയിച്ചു. ഏതായാലും ഞങ്ങക്കിനി സൗജന്യ റേഷന്‍ കിട്ടുവല്ലോ... ഒത്തിരി ഉപകാരം'-ജസീന്ത പറഞ്ഞു.  

കടലേറ്റത്തെ തുടര്‍ന്ന് കഴിഞ്ഞ അഞ്ചുവര്‍ഷമായി ജസീന്തയും കുടുംബവും വലിയതുറ സര്‍ക്കാര്‍ യു.പി സ്‌കൂളിലെ ദുരിതാശ്വാസ കാംപിലാണ് താമസം. എ.പി.എല്‍ വിഭാഗത്തിലുള്ള വെള്ള റേഷന്‍ കാര്‍ഡാണ് (മുന്‍ഗണനേതര സബ്‌സിഡി രഹിത) ഇവര്‍ക്ക് അനുവദിച്ചിരുന്നത്. ഇത് ബി.പി.എല്‍ കാര്‍ഡാക്കി മാറ്റുന്നതിനുള്ള അപേക്ഷ നല്‍കി കാത്തിരിക്കാന്‍ തുടങ്ങിയിട്ട് വര്‍ഷങ്ങളായി. സംഭവം സുപ്രഭാതം വാര്‍ത്തയാക്കിയതോടെ ഭക്ഷ്യവകുപ്പ് ഇടപെട്ട് അടിയന്തര നടപടി സ്വീകരിക്കുകയായിരുന്നു. 

അതേസമയം കാര്‍ഡ് മുന്‍ഗണനാ വിഭാഗത്തിലേക്ക് മാറ്റുന്നതിനുള്ള നടപടി പുരോഗമിക്കുകയായിരുന്നുവെന്ന് ഭക്ഷ്യവകുപ്പ് അറിയിച്ചു.

നവംബര്‍ മുതലേ നടപടി സ്വീകരിച്ചുവരികയായിരുന്നുവെന്നും അധികൃതര്‍ അറിയിച്ചു.