കോഴിക്കോട്: കോര്‍പറേഷന്‍ ഓഫിസ് കോംപൗണ്ടില്‍ പ്രവര്‍ത്തിക്കുന്ന കാന്റീന്‍ വൃത്തിഹീനമായ സാഹചര്യത്തിലാണു പ്രവര്‍ത്തിക്കുന്നതെന്നു ഭക്ഷ്യസുരക്ഷാ വിഭാഗം  നടത്തിയ പരിശോധനയില്‍ കണ്ടെത്തി. ഇതേതുടര്‍ന്ന്, കാന്റീനില്‍ ആവശ്യമായ സൗകര്യങ്ങളൊരുക്കണമെന്നും വൃത്തിഹീനമായ സാഹചര്യം ഉടന്‍ മാറ്റണമെന്നും ആവശ്യപ്പെട്ട് കാന്റീന്‍ നടത്തുന്ന കുറ്റിക്കാട്ടൂര്‍ വെള്ളിപറമ്പ് അരീക്കല്‍ സ്വദേശി വി.പി ബൈജുവിന് നോട്ടിസ് നല്‍കി.
കാന്റീനില്‍ പഴകിയ ചോറും മറ്റും സൂക്ഷിക്കുന്നുണ്ടെന്ന പരാതിയുടെ അടിസ്ഥാനത്തിലാണ് ഇന്നലെ രാവിലെ ഒന്‍പതോടെ ഭക്ഷ്യസുരക്ഷാ വിഭാഗം ഉദ്യോഗസ്ഥര്‍ പരിശോധനയ്‌ക്കെത്തിയത്. കോര്‍പറേഷന്‍ ആരോഗ്യവിഭാഗം അധികൃതരും ഒപ്പമുണ്ടായിരുന്നു.
പഴകിയ ഭക്ഷണ സാധനങ്ങളൊന്നും കണ്ടെത്താനായില്ലെങ്കിലും വൃത്തിഹീനമായ സാഹചര്യത്തിലാണ് കാന്റീന്‍ പ്രവര്‍ത്തിക്കുന്നതെന്നു ബോധ്യപ്പെട്ടു. വൃത്തിഹീനമായ അടുക്കളഭാഗം അടിയന്തരമായി നവീകരിക്കാനും നിര്‍ദേശം നല്‍കി. പഴകിയതും ഉപയോഗശൂന്യവുമായ പച്ചക്കറിയും കണ്ടെത്തിയിട്ടുണ്ട്.
കോര്‍പറേഷന്‍ കാന്റീനിനു പുറമെ ഭക്ഷ്യസുരക്ഷാ വകുപ്പിന്റെ നേതൃത്വത്തില്‍ മറ്റു രണ്ടു സ്ഥാപനങ്ങളിലും പരിശോധന നടത്തി. പി.വി.എസ് ആശുപത്രിയിലെ കാന്റീനിലും നഴ്‌സിങ് കോളജ് ഹോസ്റ്റലിലെ മെസിലുമാണു പരിശോധന നടത്തിയത്.
ആശുപത്രി കാന്റീന്‍ മാനദണ്ഡങ്ങള്‍ പാലിച്ചാണു പ്രവര്‍ത്തിക്കുന്നതെന്നു ബോധ്യപ്പെട്ടതായി അധികൃതര്‍ പറഞ്ഞു. ഹോസ്റ്റല്‍ മെസിന് ആവശ്യമായ ലൈസന്‍സെടുക്കാനും മെച്ചപ്പെട്ട സൗകര്യങ്ങളൊരുക്കാനും നിര്‍ദേശിച്ചുള്ള നോട്ടിസ് നല്‍കി.
ഫുഡ് സേഫ്റ്റി അസി. കമ്മിഷണര്‍ പി.കെ ഏലിയാമ്മ, കോഴിക്കോട് സൗത്ത് ഫുഡ് സേഫ്റ്റി ഓഫിസര്‍ കെ. സുജയന്‍, ഫുഡ് സേഫ്റ്റി മൊബൈല്‍ വിജിലന്‍സ് സ്‌ക്വാഡ് ഓഫിസര്‍ പി.ജെ വര്‍ഗീസ് പരിശോധനയ്ക്കു നേതൃത്വം നല്‍കി. മോശമായ സാഹചര്യത്തില്‍ കാണപ്പെട്ട കോര്‍പറേഷന്‍ കാന്റീന്‍ നവീകരിക്കാന്‍ നിര്‍ദേശം നല്‍കിയിട്ടുണ്ടെന്നും നവീകരിച്ചശേഷം മാത്രമേ കാന്റീന്‍ പ്രവര്‍ത്തിക്കുകയുള്ളൂവെന്നും ആരോഗ്യ സ്റ്റാന്‍ഡിങ് കമ്മിറ്റി ചെയര്‍മാന്‍ കെ.വി ബാബുരാജ് അറിയിച്ചു.