കോഴിക്കോട്: നഗരം കേന്ദ്രീകരിച്ച് സ്‌കൂട്ടറില്‍ കഞ്ചാവ് വിതരണം ചെയ്യുന്ന സംഘത്തിലെ രണ്ടുപേര്‍ അറസ്റ്റില്‍. കൊളത്തറ സ്വദേശി മജീദ് പി.ടി, ചേളന്നൂര്‍ സ്വദേശി രാജഗോപാല്‍ എന്ന ബാവൂട്ടി എന്നിവരെയാണ് കോഴിക്കോട് അരയിടത്തുപാലത്തിനു സമീപത്തു വച്ച് കോഴിക്കോട് എക്‌സൈസ് എന്‍ഫോഴ്‌സ്‌മെന്റ് ആന്‍ഡ് ആന്റി നാര്‍കോട്ടിക് സ്‌പെഷല്‍ സ്‌ക്വാഡ് അറസ്റ്റ് ചെയ്തത്.
സ്‌കൂട്ടറില്‍ കഞ്ചാവു കടത്തുകയായിരുന്ന പ്രതികള്‍ എക്‌സൈസിന്റെ വാഹന പരിശോധനയ്ക്കിടെയാണു പിടിയിലായത്. ഇവരില്‍ നിന്ന് 500 ഗ്രാം കഞ്ചാവ് പിടിച്ചെടുത്തു. ഇരുവരും മുന്‍പും കഞ്ചാവുകേസില്‍ പ്രതികളാണ്. എക്‌സൈസ് കമ്മിഷണറുടെ നിര്‍ദേശപ്രകാരം പ്രതികളെ നിരീക്ഷിച്ചുവരികയായിരുന്നു. 500 ഗ്രാമിന്റെ പൊതികളാക്കി ചെറുകിട കഞ്ചാവ് വില്‍പനക്കാര്‍ക്കു വിതരണം ചെയ്യുകയാണ് ഇവരുടെ രീതി. മുഖ്യപ്രതിയായ മജീദ് ബ്രൗണ്‍ ഷുഗര്‍ കൈവശംവച്ച കേസില്‍ 10 വര്‍ഷം ജയില്‍ ശിക്ഷ കഴിഞ്ഞു പുറത്തിറങ്ങി രാജഗോപാലിനെ കൂട്ടാളിയാക്കി കോഴിക്കോട് ടൗണ്‍, സരോവരം, കോഴിക്കോട് ബീച്ച് എന്നിവിടങ്ങളില്‍ കഞ്ചാവു വില്‍പന നടത്തിവരികയായിരുന്നു.
സര്‍ക്കിള്‍ ഇന്‍സ്‌പെക്ടര്‍ ജി. ഹരികൃഷ്ണ പിള്ള, എക്‌സൈസ് ഇന്‍സ്‌പെക്ടര്‍ പി. മുരളീധരന്‍, അസി. എക്‌സൈസ് ഇന്‍സ്‌പെക്ടര്‍ കെ. യൂസഫ്, പ്രിവന്റിവ് ഓഫീസര്‍ പി. മനോജ്, സിവില്‍ എക്‌സൈസ് ഓഫിസര്‍മാരായ യു.പി മനോജ്കുമാര്‍, എം. ധനീഷ്‌കുമാര്‍, സി. മനോജ്, ആര്‍. രജ്ഞിത്ത്, പി.കെ അനില്‍കുമാര്‍, എം. മനു, എം. സജീവന്‍, കെ.എം ഉല്ലാസ്, ശ്രീധരന്‍ എന്നിവരാണു പരിശോധക സംഘത്തിലുണ്ടായിരുന്നത്.