ബംഗളൂരു: ടിക് ടോക് വീഡിയോ പകര്‍ത്തുന്നതിനിടെ കോളജ് വിദ്യാര്‍ത്ഥിനി കുളത്തില്‍ വീണ് മരിച്ചു. അവസാനവര്‍ഷ ബി.എ ബിരുദ വിദ്യാര്‍ത്ഥിനിയായ മാല (20) ആണ് മരിച്ചത്. കര്‍ണാടകയിലെ കോലാറിലാണ് സംഭവം.

കോലാറിലെ വേദഗിരിയില്‍ 30 അടി താഴ്ച്ചയുളള കുളത്തിലേക്കാണ് മാല വീണതെന്നാണ് റിപ്പോര്‍ട്ട്. ടിക് ടോക് വീഡിയോകള്‍ സ്ഥിരമായി എടുക്കാറുളള മാല പഠനത്തിലും മിടുക്കിയാണെന്ന് അധ്യാപകര്‍ വ്യക്തമാക്കി. ഈയടുത്ത് സ്‌കോളര്‍ഷിപ്പായി 10,000 രൂപയും വിദ്യാര്‍ഥിനിക്ക് ലഭിച്ചിരുന്നു.

മാലയുടെ പിതാവ് നാരായണപ്പ കൂലിപ്പണിക്കാരനാണ്. മാതാവ് രത്‌നമ്മ വീട്ടമ്മയാണ്. പെണ്‍കുട്ടി വീഡിയോ പകര്‍ത്തിയ ഫോണ്‍ കണ്ടെത്താനായിട്ടില്ല. പിതാവ് പശുക്കള്‍ക്ക് നല്‍കാന്‍ വൈക്കോലെടുക്കാന്‍ അയച്ചതായിരുന്നു മാലയെ എന്നാണ് വിവരം. ഇതിനിടയിലാണ് വീഡിയോ പകര്‍ത്തിയത്.