കാസര്‍കോട്: ഓടിക്കൊണ്ടിരുന്ന ടാങ്കര്‍ലോറിയുടെ ടയറിനു തീപ്പിടിച്ചതു പരിഭ്രാന്തിക്കിടയാക്കി. ചെമ്മനാട് ചന്ദ്രഗിരിപ്പാലത്തിനു സമീപം ഇന്നലെ പുലര്‍ച്ചെ ഒന്നോടെയാണ് സംഭവം. മംഗളൂരുവില്‍നിന്നു കൊല്ലത്തേക്ക് ഗ്യാസുമായി പോവുകയായിരുന്ന ടാങ്കര്‍ ലോറിയുടെ ടയറിനാണ് തീപിടിച്ചത്.
സമീപവാസികള്‍ വിവരം അറിയിച്ചതിനെ തുടര്‍ന്ന് ഡ്രൈവര്‍ ലോറി നിര്‍ത്തി നോക്കിയപ്പോഴാണ് ടയര്‍ കത്തുന്നതായി കണ്ടത്. ഗ്യാസ് നിറച്ച ടാങ്കറായതിനാല്‍ ഇതു വന്‍ പരിഭ്രാന്തിക്കിടയാക്കി. സമീപത്തുണ്ടായിരുന്നവരെല്ലാം സ്ഥലത്തുനിന്ന് ഓടിരക്ഷപ്പെട്ടു. അഗ്നിശമന സേനയും പൊലിസും സ്ഥലത്തെത്തിയാണ് തീയണച്ചത്. അതിനിടെ പൊലിസ് കെ.എസ്.ടി.പി പാതയില്‍ കൂടിയുള്ള വാഹനഗതാഗതവും തടഞ്ഞു.
തുടര്‍ന്ന് അഗ്നിശമനസേന തീയണച്ചശേഷം ടയര്‍ മാറ്റിയ ശേഷം സുരക്ഷ ഉറപ്പു വരുത്തി ടാങ്കര്‍ ലോറി യാത്ര തുടര്‍ന്നു.