മേപ്പയ്യൂര്‍: കലയെ സമൂഹ തിന്മകള്‍ക്കെതിരേയുള്ള ആയുധമാക്കണമെന്ന് വയലാര്‍ അവാര്‍ഡ് ജേതാവ് യു.കെ കുമാരന്‍. ലിമേഷ് മേപ്പയ്യൂര്‍ സംഗീതം നല്‍കി രവീന്ദ്രന്‍ മേപ്പയ്യൂര്‍, മനോജ് പൂതേരിപ്പാറ എന്നിവര്‍ രചിച്ച 'ഹൃദയരാഗങ്ങള്‍' എന്ന കവിതകളുടെ സി.ഡി പ്രകാശനം നിര്‍വഹിച്ച് സംസാരിക്കുകയായിരുന്നു അദ്ദേഹം.
വില്‍സണ്‍ സാമുവല്‍ സി.ഡി ഏറ്റുവാങ്ങി. എ.എം കുഞ്ഞിരാമന്‍ അധ്യക്ഷനായി. സംസ്‌കാരിക സമ്മേളനം പഞ്ചായത്ത് പ്രസിഡന്റ് പി.കെ റീന ഉദ്ഘാടനം ചെയ്തു. വി.ഐ. ഹംസ, മൊയ്തു മനക്കല്‍, ബാബുരാജ് കല്‍പത്തൂര്‍, മജീദ് കാവില്‍, ടി.കെ ഗംഗാധരന്‍, മലയില്‍ ഗോപാലന്‍ സംസാരിച്ചു. പ്ലസ് ടു പരീക്ഷയില്‍ ഉന്നതവിജയം നേടിയ അരയന പി. ബാബുവിനെ അനുമോദിച്ചു. തുടര്‍ന്ന് കവിയരങ്ങും ഗാനമേളയും നടന്നു. സത്യന്‍ വിളയാട്ടൂര്‍ സ്വാഗതവും എം.ടി ബാബു മാസ്റ്റര്‍ നന്ദിയും പറഞ്ഞു.