ദുബൈ: ഐ.സി.സിയുടെ ഏറ്റവും പുതിയ ഏകദിന റാങ്കിങില്‍ ബംഗ്ലാദേശിന് കുതിച്ചുചാട്ടം. ചാംപ്യന്‍സ് ട്രോഫിക്ക് മുന്നോടിയായി ഐ.സി.സി പുറത്തിറക്കിയ പുതിയ ഏകദിന റാങ്കിങില്‍ ചരിത്രത്തിലാദ്യമായി ആറാം സ്ഥാനത്തെത്തിയിരിക്കുകയാണ് ബംഗ്ലാദേശ്. മൂന്ന് സ്ഥാനങ്ങളാണ് ബംഗ്ലാദേശ് ഒറ്റയടിക്ക് മെച്ചപ്പെടുത്തിയത്.

ന്യൂസിലന്‍ഡും അയര്‍ലഡും അടങ്ങിയ ത്രിരാഷ്ട്ര ടൂര്‍ണമെന്റിലെ കിരീട നേട്ടമാണ് ബംഗ്ലാദേശിനെ തുണച്ചത്. 93 പോയന്റാണ് ബംഗ്ലാദേശിനുളളത്. സമീപ കാലത്ത് അന്താരാഷ്ട്ര ക്രിക്കറ്റില്‍ ബംഗ്ലാദേശ് പുലര്‍ത്തുന്ന മികച്ച പ്രകടനം പട്ടികയില്‍ മുന്നേറാന്‍ അവരെ തുണച്ചു. മുന്‍ ലോക ചാംപ്യന്‍മാരായ ശ്രീലങ്ക, പാകിസ്താന്‍, വെസ്റ്റിന്‍ഡീസ് ടീമുകളെ പിന്തള്ളിയാണ് ബംഗ്ലാ കടുവകളുടെ മുന്നേറ്റം.

റാങ്കിങില്‍ 122 പോയിന്റുമായി ദക്ഷിണാഫ്രിക്കയാണ് ഒന്നാമത്. 118 പോയിന്റോടെ ആസ്‌ത്രേലിയയും 117 പോയിന്റോടെ ഇന്ത്യയും രണ്ടും മൂന്നും സ്ഥാനങ്ങളില്‍. 114 പോയിന്റോടെ ന്യൂസിലന്‍ഡ് നാലാമതും 111 പോയിന്റോടെ ഇംഗ്ലണ്ട് അഞ്ചാം സ്ഥാനത്തുമുണ്ട്. ശ്രീലങ്ക, പാകിസ്താന്‍, വെസ്റ്റിന്‍ഡീസ് ടീമുകള്‍ ഏഴും എട്ടും ഒന്‍പതും സ്ഥാനങ്ങളില്‍. അഫ്ഗാനിസ്ഥാന്‍ പത്തിലും സിംബാബ്‌വെ, അയര്‍ലന്‍ഡ് ടീമുകള്‍ 11, 12 സ്ഥാനങ്ങളില്‍.