പാലക്കാട്: 1967ല്‍ നിലവില്‍വന്ന പ്രസ് കൗണ്‍സില്‍ ഓഫ് ഇന്ത്യ സുവര്‍ണ ജൂബിലി നിറവില്‍. മുഴുവന്‍ സംസ്ഥാനങ്ങളിലും മാധ്യമപ്രവര്‍ത്തകര്‍, സാമൂഹികപ്രവര്‍ത്തകര്‍, സംഘടനകള്‍ എന്നിവയുടെ സഹകരണത്തോടെ ആഘോഷപരിപാടികള്‍ നടത്താന്‍ പ്രസ്‌കൗണ്‍സില്‍ ഓഫ് ഇന്ത്യ തീരുമാനിച്ചു. ഇതിന്റെ ഭാഗമായി ഈ മാസം 26ന് തിരുവനന്തപുരം പ്രസ്‌ക്ലബിലെ ഫോര്‍ത്ത് എസ്റ്റേറ്റ് ഹാളില്‍ കേരളത്തിലെ ആഘോഷങ്ങള്‍ക്കു തുടക്കമാകും. മാധ്യമ ധാര്‍മികത രൂപപ്പെടുത്തുന്നതില്‍ പ്രസ്‌കൗണ്‍സില്‍ ഓഫ് ഇന്ത്യ വഹിച്ച പങ്കിനെക്കുറിച്ചുള്ള സെമിനാര്‍ 26നു രാവിലെ 11ന് ആരംഭിക്കും. പ്രസ്‌കൗണ്‍സില്‍ ചെയര്‍മാനോടും മറ്റു അംഗങ്ങളോടും പൊതുജനങ്ങള്‍ക്ക് ആശയവിനിമയം നടത്താനുള്ള സെഷന്‍ ഉച്ചയ്ക്ക് രണ്ടിന് നടക്കും. ആഘോഷപരിപാടികളുടെ സംഘാടനത്തിനായി മാധ്യമപ്രവര്‍ത്തകരായ വി.ബി രാജന്‍ (ചെയര്‍മാന്‍), വി.ടി സന്തോഷ്‌കുമാര്‍ (ജനറല്‍ കണ്‍വീനര്‍), ബഷീര്‍ മാടാല( കണ്‍വീനര്‍) എന്നിവരെ തെരഞ്ഞെടുത്തു.