സുല്‍ത്താന്‍ ബത്തേരി: തലചായ്ക്കാന്‍ ഒരുപിടി മണ്ണിനായി ഗോത്രജനത നടത്തിയ മുത്തങ്ങ ഭൂസമരം നടന്നിട്ട് 19 വര്‍ഷം പിന്നിടുമ്പോഴും സമരത്തില്‍ പങ്കെടുത്ത ഏഴു കുടുംബങ്ങള്‍ക്ക് ഇന്നും ഭൂമി ലഭിച്ചില്ല.
സമരത്തില്‍ പങ്കെടുത്ത കുടുംബങ്ങള്‍ക്കു ഭൂമി നല്‍കുമെന്ന് സര്‍ക്കാര്‍ പ്രഖ്യാപിച്ചിരുന്നെങ്കിലും അതു പൂര്‍ണതയിലെത്തിയിട്ടില്ല. ഭൂമി ലഭിക്കാത്ത ഏഴു കുടുംബങ്ങള്‍ ഇന്നും കോളനികളിലെ കൂരകള്‍ക്കുള്ളില്‍ കഴിഞ്ഞുകൂടുകയാണ്. സുല്‍ത്താന്‍ ബത്തേരിക്കു സമീപം ഉള്ളില്‍ പണിയ കോളനിയിലെ കുടുംബങ്ങള്‍ക്കാണ് ഇതുവരെ ഭൂമി ലഭിക്കാത്തത്. കോളനിയിലെ ചൊറിയന്‍-ശാന്ത, വെരുക്-ശാന്ത, ഞേണന്‍-ജാനു, കൊഞ്ചന്‍-കെമ്പി, അപ്പു-സരിത, കുഞ്ഞന്‍-ചിരങ്ക, കാമന്‍- ദേവി എന്നിവരാണ് 19 വര്‍ഷം മുമ്പ് നടന്ന ഭൂസമരത്തില്‍ പങ്കെടുത്ത ദമ്പതിമാര്‍. ഇതില്‍ സമരത്തില്‍ പങ്കെടുത്ത കാമന്‍, കെമ്പി എന്നിവര്‍ ഇതിനോടകം മരിച്ചു. സമരത്തിനിടെ പൊലിസ് മര്‍ദനമേറ്റ് ജോലി ചെയ്യാന്‍ പോലും പറ്റാത്ത അവസ്ഥയിലാണ് പല കുടുംബങ്ങളും.
സമരത്തില്‍ പങ്കെടുത്ത കുടുംബങ്ങളില്‍ നിരവധി പേര്‍ക്ക് ഒരേക്കര്‍ ഭൂമിവീതം ലഭിച്ചെങ്കിലും ഇവര്‍ക്ക് നിരാശയായിരുന്നു ഫലം.
സമരത്തിനു ശേഷം ഭൂമിക്കായി ഒാഫിസുകള്‍ കയറിയിറങ്ങിയെങ്കിലും ഇതുവരെ ഭൂമി ലഭിച്ചില്ലെന്ന് കോളനിക്കാര്‍ പറയുന്നു. സമരത്തിനു ശേഷം നേതാക്കളാരും ഇങ്ങോട്ടു തിരിഞ്ഞുനോക്കിയിട്ടില്ലെന്നും കോളനിക്കാര്‍ ആരോപിക്കുന്നു.