കൊല്ലം: മുന്‍സിഫ് കോടതിക്കുള്ളില്‍ അഭിഭാഷകയെ കൈയേറ്റം ചെയ്ത മുന്‍ എക്‌സൈസ് ഉദ്യോഗസ്ഥന് മജിസ്‌ട്രേറ്റ് കോടതി നല്‍കിയ ജാമ്യം ജില്ലാ സെഷന്‍സ് കോടതി റദ്ദ് ചെയ്തു. പ്രതിയെ അറസ്റ്റ് ചെയ്തു കോടതിയില്‍ ഹാജരാക്കാന്‍ കൊല്ലം വെസ്റ്റ് സബ് ഇന്‍സ്‌പെക്ടര്‍ക്കു നിര്‍ദേശവും നല്‍കി. കഴിഞ്ഞ ആഗസ്റ്റ് 31ന് രാവിലെ കോടതി തുടങ്ങിയ ഉടനെയായിരുന്നു സംഭവം.
കോടതിക്കുള്ളില്‍ അഭിഭാഷക ഇരുന്ന ബെഞ്ചില്‍ അടുത്തുവന്നിരുന്ന പ്രതി അഭിഭാഷകയെ ദുരുദ്ദേശത്തില്‍ സ്പര്‍ശിച്ചതായിരുന്നു കേസിനാധാരം. തുടര്‍ന്ന് അഭിഭാഷകയുടെ പരാതിയില്‍ പൊലിസ് പ്രതിയെ അറസ്റ്റ്് ചെയ്തു ജാമ്യമില്ലാ വകുപ്പ് ചേര്‍ത്ത് കേസെടുത്തു. എന്നാല്‍ പ്രതിക്ക് കൊല്ലം താല്‍കാലിക മജിസ്‌ട്രേറ്റ് കോടതിജാമ്യം നല്‍കി. ജാമ്യ ഉത്തരവില്‍ പ്രതിക്കെതിരെയുള്ള കേസ് അവിശ്വസനീയമെന്ന് അഭിപ്രായപ്പെടുകയും ചെയ്തു. ഇത്തരം പരാമര്‍ശം വിചാരണക്കും തെളിവെടുപ്പിനും മുമ്പ് മജിസ്‌ട്രേറ്റ് നടത്തിയത് നിയമവിരുദ്ധമാണെന്ന് ജില്ലാ കോടതി ഉത്തരവില്‍ പറയുന്നു. തുടര്‍ന്ന് തെറ്റായ നിലപാടില്‍ നല്‍കിയ ജാമ്യം ജില്ലാ കോടതി റദ്ദാക്കുകയായിരുന്നു. പ്രതിയെ കസ്റ്റഡിയില്‍ എടുത്തു കോടതി മുന്‍പാകെ ഹാജരാക്കാനും ഉത്തരവുണ്ട്.