ബെയ്ജിങ്: ചൈന സ്വന്തം പ്രദേശമായി അവകാശപ്പെടുന്ന ദ്വീപില്‍ അതിര്‍ത്തി ലംഘിച്ച് അമേരിക്കയുടെ പടക്കപ്പല്‍ പ്രവേശിച്ചു. ചൈന കൃത്രിമമായി നിര്‍മിച്ച ദ്വീപിന്റെ 22 കി.മീറ്റര്‍(12 നോട്ടിക്കല്‍ മൈല്‍) അതിര്‍ത്തിയിലാണ് യു.എസ്.എസ് ഡ്യൂവേ എന്ന കപ്പല്‍ കടന്നതെന്ന് ബെയ്ജിങ് ഔദ്യോഗിക വൃത്തങ്ങള്‍ അറിയിച്ചു. ഡൊണാള്‍ഡ് ട്രംപ് അധികാരമേറ്റ ശേഷം ഇതാദ്യമായാണ് ചൈനയുടെ ദക്ഷിണ കടലിന്മേലുള്ള അവകാശവാദത്തെ ചോദ്യംചെയ്ത് അമേരിക്ക രംഗത്തെത്തിയത്.
ചൈനയും ഫിലിപ്പൈന്‍സ്, തായ്‌വാന്‍, ബ്രൂണെ, മലേഷ്യ, വിയറ്റ്‌നാം എന്നീ അയല്‍രാജ്യങ്ങളും തമ്മില്‍ അവകാശത്തര്‍ക്കത്തിലുള്ള സ്പ്രാറ്റി ദ്വീപുകളില്‍ ഒന്നിലാണ് യു.എസ് നേവി കപ്പല്‍ എത്തിയത്. അടുത്തായി നിര്‍മാണ പ്രവൃത്തികളിലൂടെയും റോക്കറ്റ് ലോഞ്ചറുകള്‍ സ്ഥാപിച്ചും ദ്വീപില്‍ മേല്‍ക്കൈ നേടാന്‍ ചൈന ശ്രമം നടത്തുന്നുണ്ട്. 21,300 കോടി ബാരല്‍ ക്രൂഡ് ഓയില്‍ ദക്ഷിണ ചൈനാ കടലിലുണ്ടെന്നാണ് കണക്ക്. ഇതു സ്വന്തമാക്കുകയാണ് അയല്‍രാജ്യങ്ങള്‍ ലക്ഷ്യമിടുന്നത്.
യു.എസ് കപ്പല്‍ ജല അതര്‍ത്തി ലംഘിച്ചത് അനുമതി കൂടാതെയാണെന്നും ദ്വീപില്‍നിന്ന് പെട്ടെന്ന് പുറത്തുകടക്കാനുള്ള നിര്‍ദേശം കപ്പല്‍ അധികൃതര്‍ക്ക് നല്‍കിയിട്ടുണ്ടെന്നും ചൈന അറിയിച്ചു. ഐക്യരാഷ്ട സഭയുടെ ഉടമ്പടി പ്രകാരം 12 നോട്ടിക്കല്‍ മൈല്‍ അതത് രാജ്യത്തിന്റെ പരമാധികാരത്തില്‍ വരുന്നതാണ്. ഇതാണ് അമേരിക്കന്‍ കപ്പല്‍ മനപ്പൂര്‍വം ലംഘിച്ചത്.