പനജി: സീസണില്‍ ജയം കാണാതെ കേരളാ ബ്ലാസ്റ്റേഴ്‌സ്. ഇന്നലെ നടന്ന അവസാന മത്സരത്തിലും കേരളാ ബ്ലാസ്റ്റേഴ്‌സിന് ജയം കണ്ടെത്താന്‍ കഴിഞ്ഞില്ല. ബംഗളൂരു എഫ്.സിക്കെതിരേ 4-2 എന്ന സ്‌കോറിനാണ് ബ്ലാസ്റ്റേഴ്‌സ് പരാജയപ്പെട്ടത്. മത്സരത്തില്‍ ആദ്യം ബ്ലാസ്റ്റേഴ്‌സ് ഗോള്‍ സ്വന്തമാക്കിയെങ്കിലും പിന്നീട് നാല് ഗോള്‍ വഴങ്ങിയാണ് ബ്ലാസ്റ്റേഴ്‌സ് തോല്‍വിയിലേക്ക് കൂപ്പുകുത്തിയത്. പ്രതിരോധത്തില്‍ കോസ്റ്റ ഇല്ലാതെയായിരുന്നു ബ്ലാസ്റ്റേഴ്‌സ് ഇറങ്ങിയത്. 17ാം മിനുട്ടില്‍ മികച്ചൊരു മുന്നേറ്റത്തിലൂടെ കെ.പി രാഹുലാണ് ബ്ലാസ്റ്റേഴ്‌സിന്റെ ആദ്യ ഗോള്‍ നേടിയത്. എന്നാല്‍ ശക്തമായ പോരാട്ടത്തിനൊടുവില്‍ ക്ലിന്റണ്‍ സില്‍വയിലൂടെ ബംഗളൂരു ഗോള്‍ തിരിച്ചടിച്ചു. ഇതോടെ ആദ്യ പകുതി 1-1 എന്ന സ്‌കോറില്‍ അവസാനിച്ചു. രണ്ടാം പകുതിയുടെ തുടക്കത്തില്‍ ബംഗളൂരുവിന് അനുകൂലമായി പെനാല്‍റ്റി ലഭിച്ചെങ്കിലും ഛേത്രിയുടെ കിക്ക് ബ്ലാസ്റ്റേഴ്‌സ് ഗോള്‍ കീപ്പര്‍ ആല്‍ബിനോ ഗോമസ് അനായാസം കൈയിലൊതുക്കി. 51ാം മിനുട്ടില്‍ ക്രിസ്റ്റണ്‍ ഓപ്‌സെത് ബംഗളൂരുവിന്റെ രണ്ടാം ഗോള്‍ നേടി ലീഡ് സ്വന്തമാക്കി. അധികം വൈകാതെ ബംഗളൂരുവിന്റെ മൂന്നാം ഗോളും വന്നതോടെ ബ്ലാസ്റ്റേഴ്‌സ് തളര്‍ന്നു. 53ാം മിനുട്ടില്‍ ഡിമാസാണ് ബംഗളൂരുവിന്റെ മൂന്നാം ഗോള്‍ സ്വന്തമാക്കിയത്. 61ാം മിനുട്ടില്‍ വിസന്റ് ഗോമസിലൂടെ ബ്ലാസ്റ്റേഴ്‌സ് ഒരു ഗോള്‍ മടക്കിയതോടെ സ്‌കോര്‍ 3-2 എന്ന നിലയിലായി. ഇതോടെ ബ്ലാസ്റ്റേഴ്‌സിന് വീണ്ടും പുതുജീവന്‍ ലഭിച്ചു. സമനിലക്കായി പൊരുതുന്നതിനിടയില്‍ ഛേത്രിയിലൂടെ ബംഗളൂരു നാലാം ഗോളും സ്വന്തമാക്കി. എന്നാല്‍ പിന്നീടും ബ്ലാസ്റ്റേഴ്‌സ് അക്രമണ ഫുട്‌ബോള്‍ കാഴ്ചവെച്ചെങ്കിലും ഗോള്‍ സ്വന്തമാക്കാന്‍ കഴിഞ്ഞില്ല. രണ്ടാം പകുതിക്ക് ശേഷം ബ്ലാസ്റ്റേഴ്‌സ് മികച്ച മുന്നേറ്റങ്ങള്‍ നടത്തിയെങ്കിലും ഫലം കണ്ടില്ല. ഇന്നലെ നടന്ന നോര്‍ത്ത് ഈസ്റ്റ് യുനൈറ്റഡ് ചെന്നൈയിന്‍ മത്സരം ഗോള്‍ രഹിത സമനിലയില്‍ കലാശിച്ചു.