സിഡ്‌നി: കാറില്‍ 1000 കി.മീ യാത്ര ചെയ്ത് പൊലിസിനെ ഞെട്ടിച്ചിരിക്കുകയാണ് ആസ്‌ത്രേലിയയിലെ നാല്‍വര്‍ സംഘം. 13 വയസുള്ള രണ്ട് ആണ്‍കുട്ടികളും ഒരു 14കാരനും 10 വയസുള്ള പെണ്‍കുട്ടിയുമാണ് 11 മണിക്കൂര്‍ റോഡ് യാത്ര ചെയ്ത് വിസ്മയമായത്. സംഘത്തിലെ ഒരാളുടെ വീട്ടിലെ കാര്‍ ആരോടും പറയാതെ മോഷ്ടിച്ച് യാത്രയ്ക്ക് ഉപയോഗിക്കുകയായിരുന്നു. ഒരു കുട്ടി യാത്രയെക്കുറിച്ച് എഴുതിയ എഴുത്ത് വീട്ടില്‍ വച്ചിരുന്നു. ഇതാണ് തുമ്പായതെന്ന് ക്വീന്‍സ്‌ലാന്റ് പൊലിസ് പറഞ്ഞു. ശനിയാഴ്ച റോക്കാംപ്റ്റന്‍ നഗരത്തില്‍ നിന്നാണ് യാത്ര തുടങ്ങിയത്. ഞായറാഴ്ച രാത്രിയോടെ ന്യൂ സൗത്ത് വെയില്‍സിനടുത്ത ഗ്രാഫ്റ്റനില്‍ കാര്‍ കണ്ടെത്തുകയായിരുന്നു.
പൊലിസ് പുറത്തിറങ്ങാനാവശ്യപ്പെട്ടിട്ടും ഇറങ്ങാതെ അകത്തുനിന്ന് ഡോറും ഗ്ലാസും അടയ്ക്കുകയായിരുന്നു കുട്ടികള്‍. ഒരാളല്ല മുഴുവന്‍ സമയവും കാര്‍ ഓടിച്ചതെന്ന് പൊലിസ് പറഞ്ഞു. ഇതില്‍ ഒരു കുട്ടിയുടെ വീട് ഗ്രാഫ്റ്റനിലാണ്. അങ്ങോട്ട് എല്ലാവരും ചേര്‍ന്ന് പോവുകയായിരുന്നു. യാത്രയ്ക്കു വേണ്ട പെട്രോള്‍ മോഷ്ടിച്ചതാണെന്നും പൊലിസ് പറഞ്ഞു.