കെയ്‌റോ: സെനഗലും അള്‍ജീരിയയും 32 മത് ആഫ്രിക്കന്‍ നാഷന്‍സ് കപ്പിന്റെ ഫൈനലില്‍ പ്രവേശിച്ചു. ഇന്നലെ നടന്ന രണ്ട് സെമി ഫൈനലുകളില്‍ ജയം സ്വന്തമാക്കിയാണ് ഇരു ടീമുകളും ഫൈനലിലേക്ക് യോഗ്യത നേടിയത്. ആദ്യ സെമിയില്‍ എതിരില്ലാത്ത ഒരു ഗോളിന് തുണീഷ്യയെ തകര്‍ത്താണ് സെനഗല്‍ ഫൈനലില്‍ പ്രവേശിച്ചത്.
നിശ്ചിത സമയത്ത് ഇരു ടീമുകളും സമനില പാലിച്ചതിനാല്‍ മത്സരം അധിക സമയത്തേക്ക് നീളുകയായിരുന്നു. 100-ാം മിനുട്ടില്‍ പിറന്ന സെല്‍ഫ് ഗോളിന്റെ ബലത്തിലായിരുന്നു സെനഗല്‍ ഫൈനലില്‍ പ്രവേശിച്ചത്. നിശ്ചിത സമയത്ത് ഇരു ടീമുകള്‍ക്കും ഓരോ പെനാല്‍റ്റി വീതം ലഭിച്ചുവെങ്കിലും ഗോള്‍ കീപ്പര്‍മാര്‍ രക്ഷകരാവുകയായിരുന്നു. 2002 ല്‍ നിര്‍ഭാഗ്യം കൊണ്ട് നഷ്ടമായ കിരീടം തിരിച്ച് പിടിക്കാനുള്ള ഒരുക്കത്തിലാണ് സാദിയോ മാ നെയും സംഘവും. മറ്റൊരു മത്സരത്തില്‍ 2 - 1 എന്ന സ്‌കോറിന് അള്‍ജീരിയ നൈജീരിയയെ പരാജയപ്പെടുത്തി. 40-ാം മിനുട്ടില്‍ നൈജീരിയയുടെ സെല്‍ഫ് ഗോളിലായിരുന്നു അള്‍ജീരീയ മുന്നിലെത്തിയത്.
72-ാം മിനുട്ടില്‍ ലഭിച്ച പെനാല്‍റ്റി നൈജീരിയന്‍ താരം ഒഡിയോ ഇംഗാളോ ലക്ഷ്യത്തിലെത്തിച്ച് സമനില പിടിച്ചു. എന്നാല്‍ മത്സരത്തിന്റെ 95-ാം മിനുട്ടില്‍ റിയാദ് മെഹ്‌റസിന്റെ ഗോളിലായിരുന്നു അള്‍ജീരിയ ഫൈനല്‍ ഉറപ്പിച്ചത്. ആഫ്രിക്കന്‍ നാഷന്‍സ് കപ്പില്‍ രണ്ടാം തവണ മാത്രം കളിക്കാനെത്തുന്ന അള്‍ജീരിയ മികച്ച നേട്ടമാണ് സ്വന്തമാക്കിയത്.