പുല്‍പ്പള്ളി: വനഗ്രാമമായ ചേകാടിയിലേക്കുള്ള കെ.എസ്.ആര്‍.ടി.സി ബസിന്റെ ട്രിപ്പ് മുടക്കം ജനങ്ങളെ വലയ്ക്കുന്നു.
സര്‍വിസ് കുറ്റമറ്റ രീതിയില്‍ നടത്തുന്നതിനു അടിയന്തര നടപടി തേടി അധികൃതരെ സമീപിക്കാനുള്ള ഒരുക്കത്തിലാണ് ഗ്രാമവാസികള്‍. ചേകാടിക്കാര്‍ നിരന്തരം ആവശ്യപ്പെട്ടതിനെത്തുടര്‍ന്ന് അഞ്ച് വര്‍ഷം മുന്‍പ് ആരംഭിച്ചതാണ് ബസ് സര്‍വിസ്.കുറച്ച് ദിവസങ്ങളായി ഉച്ചകഴിഞ്ഞ് ടിപ്പുകള്‍ റദ്ദാക്കുകയാണ്. ഇത് വിദ്യാര്‍ഥികളെയടക്കം ദുരിതത്തിലാക്കി. കഴിഞ്ഞ ദിവസം ജനമൈത്രി പൊലിസിന്റെ നേതൃത്വത്തിലാണ് വിദ്യാര്‍ഥികളെ ടൗണില്‍നിന്നു ചേകാടിയിലെത്തിച്ചത്.വന്യജീവികള്‍ വിഹരിക്കുന്ന വനത്തിലൂടെയാണ് ചേകാടിയിലേക്കുള്ള വഴി. വനത്തിലൂടെ ഓട്ടം പോകാന്‍ പലപ്പോഴും ഓട്ടോ ഡ്രൈവര്‍മാര്‍ തയാറാകുന്നില്ല.