തിരുവനന്തപുരം: നാടിന്റെയാകെ സഹകരണത്തോടും പിന്തുണയോടും പ്രളയാനന്തര കേരളം പുനഃസൃഷ്ടിക്കാന്‍ പൊതുസമവായം ഉയര്‍ന്നുവരണമെന്ന് മുഖ്യമന്ത്രി പിണറായി വിജയന്‍. നേതൃപരമായ പങ്കു സര്‍ക്കാര്‍ വഹിക്കുമ്പോള്‍ പൊതുവായ അഭിപ്രായം ഉരുത്തിരിയുന്നതില്‍ മാധ്യമങ്ങള്‍ക്കു വലിയ പങ്ക് വഹിക്കാനാകുമെന്നും അദ്ദേഹം പറഞ്ഞു.
പ്രളയാനന്തര പുനര്‍നിര്‍മാണവുമായി ബന്ധപ്പെട്ട 'റീബില്‍ഡ് കേരള' കര്‍മ പദ്ധതികള്‍ വിശദീകരിക്കാന്‍ വിളിച്ചുചേര്‍ത്ത മാധ്യമ എഡിറ്റര്‍മാരുടെ യോഗത്തില്‍ സംസാരിക്കുകയായിരുന്നു അദ്ദേഹം. കേരളത്തിന്റെ പൊതുവായ വികസനമാണ് വേണ്ടത്. ഇതുമായി ബന്ധപ്പെട്ട വിഷയങ്ങളില്‍ പൊതുവീക്ഷണം ഉയര്‍ന്നുവരുന്നത് സ്വീകരിക്കുകയാണ് ലക്ഷ്യം.
പ്രളയദുരന്തമുണ്ടായി ഒരു വര്‍ഷമാകുകയാണ്. പുനരധിവാസവുമായി ബന്ധപ്പെട്ട സഹായങ്ങള്‍ നല്‍കിവരികയാണ്. വീടുകളുടെ പുനര്‍നിര്‍മാണവും പുരോഗമിക്കുകയാണ്. അപകടസാധ്യത കാരണം വീടുനിര്‍മിക്കാന്‍ പറ്റാത്ത സ്വന്തം സ്ഥലത്തുനിന്നു മാറിത്താമസിക്കാന്‍ ചിലര്‍ വിമുഖത കാട്ടുന്നുണ്ട്. ഇക്കാര്യങ്ങള്‍ ബോധ്യപ്പെടുത്തി അവരെ സുരക്ഷിത സ്ഥാനത്തേക്കു മാറ്റുന്നതില്‍ മാധ്യമങ്ങളും പങ്ക് വഹിക്കണം. സ്ഥിരമായി വെള്ളം കയറുന്ന സ്ഥലങ്ങള്‍, കടലാക്രമണ ഭീഷണിയുള്ള സ്ഥലങ്ങള്‍ എന്നിവിടങ്ങളിലുള്ളവരെ അവരുടെ ജീവനോപാധിയെ ബാധിക്കാത്തവിധം മാറ്റിപ്പാര്‍പ്പിക്കല്‍ ലക്ഷ്യമാണ്. പ്രളയാനന്തര സഹായവുമായി ബന്ധപ്പെട്ട് 2019 ജനുവരി 31 വരെ 1,35,000 അപ്പീല്‍ ലഭിച്ചിരുന്നു. പിന്നീട് ഫ്രെബ്രുവരി, മാര്‍ച്ച് മാസങ്ങളില്‍ 15,000 അപ്പീലുകളും കിട്ടി. ഇവ തീര്‍പ്പാക്കി. പിന്നീട് കാലാവധി നീട്ടിയപ്പോഴാണ് വന്‍തോതില്‍ രണ്ടരലക്ഷത്തോളം അപ്പീലുകള്‍ വന്നത്. ഇതില്‍ അര്‍ഹതയുള്ള ആള്‍ക്കാര്‍ ആരെങ്കിലും വിട്ടുപോയിട്ടുണ്ടെങ്കില്‍ അവര്‍ക്ക് സഹായം ലഭിക്കുംവിധം സംരക്ഷിക്കും.പുനര്‍നിര്‍മാണ പ്രവര്‍ത്തനങ്ങളുടെ നടത്തിപ്പ് വേഗത്തില്‍ മുന്നോട്ടുകൊണ്ടുപോകാനാണ് ശ്രമം. ഇതിനായി പുതിയ കഴിവുകളിലേക്ക് സര്‍ക്കാര്‍ വകുപ്പുകളേയും ഏജന്‍സികളേയും ഉയര്‍ത്താനാകണം. ഇവയെ ഇതിനായി ശാക്തീകരിച്ച് തികഞ്ഞ പ്രൊഫഷണല്‍ സമീപനത്തിലേക്ക് മാറാനാണ് ശ്രമം. വികസന വിഷയങ്ങളില്‍ സമവായമാണ് ആവശ്യം. കേരളത്തിന്റെ പൊതുവായ നന്മയ്ക്കും വികസന കാര്യങ്ങള്‍ക്കും ഒന്നിച്ചുനില്‍ക്കാനും സമവായത്തോടെ മുന്നോട്ടുപോകാനും കഴിയണം. ഇക്കാര്യങ്ങളില്‍ മാധ്യമങ്ങളുടെ സഹകരണം അനിവാര്യമാണെന്നും മുഖ്യമന്ത്രി പറഞ്ഞു. പുനര്‍നിര്‍മാണവുമായി ബന്ധപ്പെട്ട അഭിപ്രായങ്ങളും നിര്‍ദേശങ്ങളും സംശയങ്ങളും എഡിറ്റര്‍മാരുമായി പങ്കുവെച്ചു. സുപ്രഭാതത്തെ പ്രതിനിധീകരിച്ച് എക്‌സിക്യുട്ടീവ് എഡിറ്റര്‍ എ.സജീവന്‍ യോഗത്തില്‍ സംബന്ധിച്ചു.