കല്‍പ്പറ്റ: ചികിത്സക്കിടെ യുവാവ് മരിച്ച സംഭവത്തില്‍ ആശുപത്രി അധികൃതരുടെ നിരുത്തരവാദപരമായ നിലപാടിനെതിരേ സമരമാരംഭിക്കാന്‍ നാട്ടുകാര്‍ ആക്ഷന്‍ കമ്മിറ്റി രൂപീകരിച്ചു. മീനങ്ങാടി കാര്യമ്പാടി ചേമ്പിലക്കണ്ടി ജാഫറാണ് ഓഗസ്റ്റില്‍ മരിച്ചത്.
വിയര്‍പ്പ് കുരുവിന് ചികിത്സിക്കാനായി ഓഗസ്റ്റ് ഒന്‍പതിനാണ് ജാഫറിനെ കല്‍പ്പറ്റയിലെ ഫാത്തിമ ആശുപത്രിയില്‍ പ്രവേശിപ്പിച്ചത്. ചികിത്സയുമായി ബന്ധപ്പെട്ട് അനസ്തീഷ്യ നല്‍കിയതിനെ തുടര്‍ന്ന് ജാഫറിന്റെ ആരോഗ്യനില മോശമാവുകയായിരുന്നുവെന്ന് ബന്ധുക്കളും നാട്ടുകാരും ആരോപിക്കുന്നു.ആരോഗ്യ നില വഷളായതിനെ തുടര്‍ന്ന് ജാഫറിനെ കോഴിക്കോട്ടെ ഒരു സ്വകാര്യ ആശുപത്രിയില്‍ പ്രവേശിപ്പിച്ചു. ഏതാനും ദിവസം ഐ.സി.യുവില്‍ കഴിഞ്ഞശേഷമാണ് ജാഫര്‍ മരിച്ചത്.ഭാര്യയും മക്കളുമുള്ള ജാഫറിന്റെ കുടുംബം അനാഥമായതോടെ കുടുംബത്തിന് നഷ്ടപരിഹാരം നല്‍കാമെന്ന് ആദ്യം ആശുപത്രി അധികൃതര്‍ പറഞ്ഞതായും പിന്നീട് അവര്‍ കാലുമാറിയെന്നുമാണ് ആക്ഷന്‍ കമ്മിറ്റി ആരോപിക്കുന്നത്. മരണത്തിലെ ദുരൂഹത നീക്കണമെന്നും ജാഫറിന്റെ കുടുംബത്തിന് നീതി ലഭ്യമാക്കണമെന്നുമാണ് ഇവരുടെ ആവശ്യം.ന
മുട്ടില്‍ പഞ്ചായത്ത് അംഗം അസീന ഷാഹുല്‍ ചെയര്‍മാനും കണിയാമ്പറ്റ പഞ്ചായത്ത് അംഗം ബിനു ജേകക്കബ് കണ്‍വീനറുമാണ്. നീതി ലഭിച്ചില്ലെങ്കില്‍ പ്രദേശവാസികളെ സംഘടിപ്പിച്ച ആശുപത്രിയിലേക്ക് മാര്‍ച്ച് ഉള്‍പ്പെടെയുള്ള സമരപരിപാടികള്‍ നടത്താനാണ് ഉദേശിക്കുന്നതെന്ന് കണ്‍വീനര്‍ ബിനു ജേക്കബ് പറഞ്ഞു.