പുനലൂര്‍ (കൊല്ലം): മകളെ പീഡിപ്പിച്ചയാളെ കൊലപ്പെടുത്താന്‍ മുംബൈയില്‍ നിന്നെത്തിയ യുവാവ് പ്രതിയുടെ വയോധികനായ പിതാവിനെ വെട്ടി പരുക്കേല്‍പിച്ചു. സംഭവശേഷം രക്ഷപ്പെട്ട പുനലൂര്‍ ഐക്കരക്കോണം ഷീബാ ഭവനില്‍ സേവ്യറിനെ (സന്തോഷ്- 40) പുനലൂര്‍ പൊലിസ് അറസ്റ്റ് ചെയ്തു.
ഐക്കരക്കോണം തെക്കേവിള പുത്തന്‍വീട്ടില്‍ തങ്കപ്പനാചാരി(80)ക്കാണ് വെട്ടേറ്റത്. സേവ്യറിന്റെ മകളെ പീഡിപ്പിച്ച കേസില്‍ റിമാന്‍ഡില്‍ കഴിഞ്ഞിരുന്ന തങ്കപ്പനാചാരിയുടെ മകന്‍ രഘു ജാമ്യത്തിലിറങ്ങിയെന്ന വിവരമറിഞ്ഞ് പ്രതികാരം ചെയ്യാനാണ് മുംബൈയിലായിരുന്ന സേവ്യര്‍ നാട്ടിലെത്തിയത്. സേവ്യര്‍ രഘുവിന്റെ വീട്ടിലെത്തിയപ്പോള്‍ തങ്കപ്പനാചാരി മാത്രമാണ് അവിടെ ഉണ്ടായിരുന്നത്.
ഇരുവരും തമ്മില്‍ വാക്കേറ്റമുണ്ടാകുകയും കൈവശമുണ്ടായിരുന്ന ആയുധമുപയോഗിച്ച് തങ്കപ്പനാചാരിയെ സേവ്യര്‍ വെട്ടുകയുമായിരുന്നെന്ന് പൊലിസ് പറഞ്ഞു. സംഭവശേഷം രക്ഷപ്പെട്ട സേവ്യറിനെ പിന്നീട് പൊലിസ് അറസ്റ്റ് ചെയ്തു. കൊലപാതകശ്രമത്തിന് ഇയാള്‍ക്കെതിരേ കേസ് രജിസ്റ്റര്‍ ചെയ്തു.