കാക്കനാട്: സ്വകാര്യ വ്യക്തികള്‍ കൈവശപ്പെടുത്തിയ ഏക്കര്‍ കണക്കിന് റവന്യു ഭൂമി തിരിച്ചുപടിക്കാന്‍ നടപടികള്‍ സജീവമായി. വാഴക്കാല വില്ലേജ് പരിധിയില്‍ തുതിയൂര്‍ പ്രദേശത്ത് വര്‍ഷങ്ങളായി സ്വകാര്യ വ്യക്തി അധീനതയിലാക്കിയ മുപ്പത്തിയേഴര സെന്റ് റവന്യു പുറമ്പോക്ക് വില്ലേജ് അധികൃതര്‍ വെള്ളിയാഴ്ച ഒഴിപ്പിച്ചെടുത്തു സര്‍ക്കാര്‍ ഭൂമിയാണെന്ന് ബോര്‍ഡ് സ്ഥാപിച്ചു.
രണ്ട് കോടിയോളം വിലമതിക്കുന്ന ഭൂമിയാണിത്. 20 വര്‍ഷത്തിലേറെയായി സ്വകാര്യ വ്യക്തി കമ്പിവേലി കെട്ടി അധീനയിലാക്കിയ ഭൂമിയാണ് റവന്യു അധികൃതര്‍ പിടിച്ചെടുത്തത്.
സ്വകാര്യ വ്യക്തി അധീനതയിലാക്കിയ ഭൂമി സംബന്ധിച്ച് രേഖകള്‍ ഹാജരാക്കുവാന്‍ വാഴക്കാല വില്ലേജ് ഓഫീസര്‍ നോട്ടീസ് നല്‍കിയെങ്കിലും മതിയായ രേഖകള്‍ ഹാജരാക്കാന്‍ കഴിഞ്ഞില്ല. ഇതേത്തുടര്‍ന്ന് ഭൂമിയുടെ മഹ്‌സര്‍ തയ്യാറാക്കി വില്ലേജ് അധികൃതര്‍ തഹസില്‍ദാര്‍ക്ക് റിപ്പോര്‍ട്ട് നല്‍കുകമായിരുന്നു.
വെളളിയാഴ്ച ഉച്ചയോടെ എല്‍.ആര്‍.തഹസില്‍ദാര്‍ സുരേഷ് കുമാറിന്റെ നേതൃത്വത്തില്‍ വില്ലേജ് ഓഫീസര്‍ സുദര്‍ശനഭായി, സ്‌പെഷല്‍ വില്ലേജ് ആഫീസര്‍ സി.കെ.സുനില്‍,ഫീല്‍ഡ് അസി.സന്തോഷ് കുമാര്‍ എന്നിവര്‍ ചേര്‍ന്നാനാണു വസ്തു റവന്യു വകുപ്പിന്റെ അധീനതയിലാക്കി ബോര്‍ഡ് സ്ഥാപിച്ചത്.
രണ്ടാഴ്ച മുമ്പ് തുതിയൂര്‍ പ്രദേശത്ത് തന്നെ സ്വകാര്യവ്യക്തി കൈവശപ്പെടുത്തിയിരുന്ന 44 സെന്റ് റവന്യു പുറമ്പോക്ക് പിടിച്ചെടുത്തിരുന്നു. കോടികള്‍ വിലമതിക്കുന്ന ഏക്കര്‍കണക്കിന് റവന്യു ഭൂമി സ്വകാര്യ വ്യക്തികളില്‍ നിന്ന് തിരിച്ചുപിടിക്കാനാണ് റവന്യു അധികൃതര്‍ ലക്ഷ്യമിടുന്നത്. കൈയേറ്റം കണ്ടെത്തി സ്‌കെച്ച് മഹസര്‍ തയ്യാറാക്കി തഹസില്‍ദാര്‍ക്ക് റിപ്പോര്‍ട്ട് നല്‍കി ഹിയറിങ് നോട്ടീസ് നല്‍കിയായാണ് പുറമ്പോക്ക് റവന്യു അധികൃതര്‍ ഒഴിപ്പിക്കുന്നത്. തുതിയൂര്‍ ഭാഗത്ത് ഏക്കര്‍ കണക്കിന് സര്‍ക്കാകാര്‍ ഭൂമി സ്വകാര്യ വ്യക്തികള്‍ അനധികൃതമായി കൈവശപ്പെടുത്തിതിയിട്ടുണ്ടെന്ന് വില്ലേജ് അധികൃതര്‍ പറഞ്ഞു.
അഞ്ചും ആറും ഏക്കര്‍ ഭൂമി സ്വന്തതമായുള്ളവരും സര്‍ക്കാര്‍ ഭൂമി അധീനതയിലാക്കിയിട്ടുണ്ട്. റവന്യൂ ഭൂമി തിരിച്ചുചുപിടിക്കുന്നതിനുള്ള നടപടികള്‍ ഊര്‍ജിതമാക്കുമെന്നു എല്‍.ആര്‍.തഹസില്‍ദാര്‍ സുരേഷ് കുമാര്‍ പറഞ്ഞു.