കാസര്‍കോട്: ചെമ്മനാട് ജമാഅത്ത് സ്‌കൂള്‍ കോംപൗണ്ടില്‍ പൊലിസ് അതിക്രമിച്ച് കടന്ന് വിദ്യാര്‍ഥികളെ അകാരണമായി തല്ലി ചതച്ച സംഭവത്തെക്കുറിച്ച് അന്വേഷണം നടത്തണമെന്ന് മുസ്‌ലിം ലീഗ് ജില്ലാ പ്രവര്‍ത്തക സമിതി യോഗം ആവശ്യപ്പെട്ടു.
സെപ്റ്റംബര്‍ 18ന് സ്‌കൂളില്‍ നടന്ന കായിക മത്സരത്തില്‍ വിജയികളായ വിദ്യാര്‍ഥികളെ പടക്കം പൊട്ടിച്ചുവെന്നാരോപിച്ചാണ് പൊലിസ് സ്‌കൂള്‍ കാംപസില്‍ കയറി നരനായാട്ട് നടത്തിയത്. പൊലിസ് അതിക്രമത്തില്‍ അന്‍പതില്‍പരം വിദ്യാര്‍ഥികള്‍ക്ക് പരുക്കേല്‍ക്കുകയും ചെയ്തിട്ടുണ്ട്. യാതൊരു പ്രകോപനവുമില്ലാതെ സ്‌കൂള്‍ മാനേജ്‌മെന്റിന്റെ അനുമതിയില്ലാതെ പൊലിസ് കോംപൗണ്ടില്‍ കയറി വിദ്യാര്‍ഥികളെയും കണ്ണില്‍ കണ്ടവരെയും തല്ലി ചതച്ചത് കടുത്ത നിയമലംഘനമാണെന്നുംഇക്കാര്യം വിശദമായി അന്വേഷിച്ച് കുറ്റവാളികള്‍ക്കെതിരേ ശക്തമായ നടപടി സ്വീകരിക്കണമെന്നും യോഗം ആവശ്യപ്പെട്ടു. പ്രസിഡന്റ് എം.സി ഖമറുദ്ധീന്‍ അധ്യക്ഷനായി.
ചെര്‍ക്കളം അബ്ദുല്ല, കോണ്‍ഗ്രസ് നേതാവ് കരിച്ചേരി നാരായണന്‍ മാസ്റ്റര്‍, അബ്ദുല്‍ റഹിമാന്‍ ഹാജി പരപ്പ, കെ. അബ്ദുല്‍ റഹിമാന്‍ ഹാജി തൃക്കരിപ്പൂര്‍, അഡ്വ. മുഹമ്മദ് പാര മഞ്ചേശ്വരം, കെ.എം മജീദ് ഹാജി പടന്ന, കെ. മുഹമ്മദ് ചെര്‍ക്കള, ഹംസ കല്ലട്ര, സിര്‍സി കുഞ്ഞാമു ഹാജി എന്നിവരുടെ വിയോഗത്തില്‍ യോഗം അനുശോചനം രേഖപ്പെടുത്തി.
സൗദിയിലെ ഹജ്ജ് ക്യാമ്പില്‍ എല്ലാ വര്‍ഷവും കേരളത്തില്‍ നിന്നും ആവശ്യമായ ഡോക്ടര്‍മാരെ ഡെപ്യൂട്ടേഷനില്‍ നിയമിക്കാറുണ്ടെങ്കിലും ഇത്തവണ ആരെയും നിയമിച്ചിട്ടില്ല. ഇത് കാരണം മലയാളി ഹാജിമാര്‍ ദുരിതമനുഭവിക്കുകയും ഭാഷ അറിയാത്തതു കാരണം സാധാരക്കാരായ മലയാളി ഹാജിമാര്‍ ആശയ വിനിമയം നടത്താന്‍ സാധിക്കാതെ പ്രയാസം നേരിടുകയും ചികിത്സ ലഭിക്കാതിരിക്കുകയും ചെയ്തിട്ടുണ്ട്. ഹജ്ജ് സേവനത്തിന് സന്നദ്ധ അറിയിച്ച് ഒട്ടനവധി ഡോക്ടര്‍മാര്‍ സംസ്ഥാന ആരോഗ്യ വകുപ്പിന് അപേക്ഷ സമര്‍പ്പിച്ചിരുന്നുവെങ്കിലും അത് ബന്ധപ്പെട്ടവര്‍ക്ക് അയച്ച് കൊടുക്കാത്തതുകൊണ്ടാണ് ഹജ്ജാജികള്‍ ദുരിതമനുഭവിച്ചത്. ഇക്കാര്യം അന്വേഷിച്ച് കുറ്റവാളികള്‍ക്കെതിരേ നടപടി സ്വീകരിക്കണമെന്ന് യോഗം ആവശ്യപ്പെട്ടു.