പറവൂര്‍: പട്ടികജാതി വിഭാഗത്തിന് ഇന്‍ഡസ്ട്രിയല്‍ എസ്റ്റേറ്റ് സ്ഥാപിക്കുവാന്‍ ഭൂമി വാങ്ങിയ ഇടപാടില്‍ അഴിമതിയുണ്ടെന്നും ഇതേകുറിച്ച് വിജിലന്‍സ് അന്വേഷണം നടത്തണമെന്നും നഗരസഭാകൌണ്‍സില്‍ യോഗത്തില്‍ പ്രതിപക്ഷം ആവശ്യപ്പെട്ടു.
ഒന്നരവര്‍ഷം മുമ്പ് നാലാം വാര്‍ഡില്‍ മുപ്പത്തൊന്ന് സെന്റ് ഭൂമിയാണ് നഗരസഭ വാങ്ങിയത്. എന്നാല്‍ നാളുതിവരെ ഇവിടെ നിര്‍മാണപ്രവര്‍ത്തനങ്ങള്‍ നടത്താന്‍ കഴിയാതെ നിയമക്കുരുക്കിലാണ് അനാവശ്യമായ ധൃതിയിലാണ് ആധാരം രജിസ്റ്റര്‍ ചെയ്തത്.
ഇപ്പോള്‍ ആധാരത്തിലുള്ള ഭൂമി കൈവശം ഉണ്ടെന്നുതെളിയിക്കാന്‍ കഴിയാത്ത അവസ്ഥയിലാണ്. ഇതിന്റെ ഫലമായി പട്ടികജാതി വിഭാഗത്തിന്റെ ക്ഷേമ വികസന പ്രവര്‍ത്തനങ്ങള്‍ തടസപ്പെട്ടിരിക്കയാണ്. അടിയന്തിരമായി വിജിലന്‍സ് അന്വേഷണം നടത്തി കുറ്റക്കാരെ കണ്ടെത്തി ശിക്ഷിക്കണമെന്ന് പ്രതിപക്ഷം ആവശ്യപ്പെട്ടു.
എന്നാല്‍ ഇപ്പോള്‍ വിജിലന്‍സ് അന്വേഷണം ആവശ്യമില്ലെന്നും ഭാവിയില്‍ ആവശ്യമെങ്കില്‍ നടത്താമെന്നുമുള്ള ചെയര്‍മാന്റെ നിലപാട് പ്രതിപക്ഷം അംഗീകരിച്ചില്ല.
തുടര്‍ന്ന് പതിനാലിനെതിരെ 15 വോട്ടുകള്‍ക്ക് പ്രതിപക്ഷ ആവശ്യം തള്ളി. പഴയ മുന്‍സിപ്പല്‍ പാര്‍ക്ക് തുറസായഇടമായി സംരക്ഷിച്ച് രാഷ്ട്രീയ സാംസ്‌ക്കാരിക ആവശ്യങ്ങള്‍ക്ക് ഉപയോഗപ്പെടുത്തണമെന്ന് പ്രതിപക്ഷാംഗങ്ങള്‍ ആവശ്യപ്പെട്ടു.
എന്നാല്‍ ഈ സ്ഥലത്ത് പബ്ലിക്ക് ടോയ് ലെറ്റ് സ്‌നാക്ക്‌സ് പാര്‍ലര്‍, പേ ആന്‍ഡ് പാര്‍ക്ക്, സെമി പെര്‍മനെന്റ് സ്റ്റാളുകള്‍ എന്നിവയോടോപ്പം രാഷ്ട്രീയകലാ, സാംസ്‌ക്കാരിക പരിപാടികള്‍ക്കുള്ള പോതുയിടം എന്നിവയോരുക്കാന്‍ നഗരസഭ തീരുമാനിച്ചതായി ചെയര്‍മാന്‍ പ്രഖ്യാപിച്ചു.
ക്ലീന്‍ ഗ്രീന്‍ പറവൂര്‍ എന്നപേരില്‍ പദ്ധതി പ്രഖ്യാപിച്ചിട്ട് മാസങ്ങള്‍ കഴിഞ്ഞിട്ടും നഗരത്തിന്റെ വിവിധ ഭാഗങ്ങളില്‍ മാലിന്യം കുന്നുകൂടിക്കിടക്കുന്ന അവസ്ഥയാണുള്ളതെന്നു പ്രതിപക്ഷം കുറ്റപ്പെടുത്തി.