കല്‍പ്പറ്റ: ശക്തമായ വരള്‍ച്ച നേരിട്ട വയനാടിന്റെ കാര്‍ഷിക മേഖലയെ കൈപിടിച്ചുയര്‍ത്താന്‍ നൂറു ശതമാനവും ധനവിനിയോഗം നടത്തി ജില്ലാ കൃഷി വകുപ്പ്. 2016-17 സാമ്പത്തിക വര്‍ഷത്തില്‍ വയനാട് ജില്ലയില്‍ സംസ്ഥാനാവിഷ്‌കൃത പദ്ധതികളില്‍ അനുവദിച്ച 4135.15554 ലക്ഷം രൂപയില്‍ 4135.15554 ലക്ഷം രൂപയും വിവിധ കേന്ദ്രാവിഷ്‌കൃത പദ്ധതികളില്‍ അനുവദിച്ച 440.62174 ലക്ഷം രൂപയും ചെലവഴിച്ചു. പദ്ധതിയേതര ഇനത്തില്‍ ലഭിച്ച 763.93538 ലക്ഷം രൂപയില്‍ 763.93136 ലക്ഷം രൂപയും ചെലവഴിച്ചു. ഈ സാമ്പത്തിക വര്‍ഷം ജില്ലയുടെ കാര്‍ഷിക വികസനത്തിനായി ആകെ അനുവദിച്ച 5339.71266 ലക്ഷം രൂപയില്‍ 5339.70864 ലക്ഷം രൂപ വിനിയോഗിച്ചു.ജില്ലയില്‍ നടപ്പാക്കിയ പച്ചക്കറി കൃഷി വികസന പദ്ധതി പ്രകാരം 2016-17 വര്‍ഷം ലഭിച്ച 276.56430 ലക്ഷം രൂപയില്‍ 276.5643 ലക്ഷം രൂപയും വകുപ്പ് ചെലവഴിച്ചു.
50 ക്ലസ്റ്ററുകളിലായി 66520 ഗുണഭോക്താക്കള്‍ക്ക് ഇതിന്റെ പ്രയോജനം ലഭിച്ചു.വീട്ടു വളപ്പില്‍ പച്ചക്കറി കൃഷിയുടെ ഭാഗമായി സ്‌കൂള്‍ കുട്ടികള്‍ക്ക് 70,000 പാക്കറ്റ് വിത്തുകളും, കൃഷിഭവന്‍ മുഖേന 70,000 പാക്കറ്റ് വിത്തുകളും ആര്‍.കെ.വി.വൈ പദ്ധതിയുടെ ഭാഗമായി 20,500 പാക്കറ്റ് വിത്തുകളും വിതരണം ചെയ്തു. നഗരപ്രദേശത്തും പച്ചക്കറി കൃഷി സാധ്യമാക്കുക എന്ന ലക്ഷ്യത്തോടെ 25 ഗ്രോബാഗ് ഒരു യൂനിറ്റ് നിരക്കില്‍ 800 യൂനിറ്റ് ഗ്രോബാഗ് വിതരണം ചെയ്തു.
എന്‍.ജി.ഒ കളില്‍ അംഗങ്ങളായിട്ടുള്ള സ്വയം സഹായ സംഘങ്ങള്‍ക്ക് 20,000 പാക്കറ്റ് പച്ചക്കറി വിത്തുകള്‍ വിതരണം ചെയ്തു.ജൈവകൃഷിപദ്ധതി 2016-17ന്റെ ഭാഗമായി 5-25 ഹെക്ടര്‍ സ്ഥലത്ത് പഴം, പച്ചക്കറി കൃഷി ചെയ്യുകയും കര്‍ഷകരെ ഉള്‍പ്പെടുത്തി ക്ലസ്റ്ററുകള്‍ ഉണ്ടാക്കി. അതിനായി ഒരുബ്ലോക്കില്‍ 2 എണ്ണം വീതം വയനാട്ടില്‍ 11 എണ്ണം തുടങ്ങി. ഒരു ക്ലസ്റ്ററിന് 75000 രൂപ പ്രകാരം 11 ക്ലസ്റ്ററിന് 8.25 ലക്ഷം രൂപ ചെലവഴിച്ചു.
ജില്ലയില്‍ 40 മണ്ണിര കമ്പോസ്റ്റ്, ബ്ലോക്ക് തലത്തില്‍ 10 എണ്ണം നല്‍കുന്നതിനായി 3 ലക്ഷം രൂപ ചെലവഴിച്ചു.
ജില്ലയില്‍ 40 റൂറല്‍ കമ്പോസ്റ്റുകളും, ബ്ലോക്ക് തലത്തില്‍ 10 എണ്ണം പ്രകാരം നല്‍കുന്നതിനായി 2 ലക്ഷം രൂപ ചെലവഴിച്ചു.
ഈ വര്‍ഷം പുല്‍പ്പള്ളി (300 ഹെക്ടര്‍), മുള്ളന്‍കൊല്ലി (200 ഹെക്ടര്‍) പഞ്ചായത്തുകളിലായി 500 ഹെക്ടര്‍ പ്രദേശത്ത് കേരഗ്രാമം പദ്ധതി നടപ്പാക്കിയതായും ബന്ധപ്പെട്ടവര്‍ അറിയിച്ചു.