റോം: അയാക്‌സിന്റെ സൂപ്പര്‍ താരാമായിരുന്ന ഡച്ച് യുവ ഡിഫന്‍ഡര്‍ ഡി ലിറ്റ് ഇനി യുവന്റസിന് സ്വന്തം. ചാംപ്യന്‍സ് ലീഗില്‍ മികച്ച പ്രകടനം നടത്തിയ താരത്തെ നേരത്തെ തന്നെ വിവിധ ക്ലബുകള്‍ നോട്ടമിട്ടിരുന്നു. ബാഴ്‌സലോണ, മാഞ്ചസ്റ്റര്‍, റയല്‍ മാഡ്രിഡ് ക്ലബുകള്‍ ഡി ലിറ്റിനായി രംഗത്തുണ്ടായിരുന്നെങ്കിലും താരം യുവന്റസിലേക്കാണ് പോയത്. ഇന്നലെ മെഡിക്കല്‍ ചെക്കപ്പിനായി താരം യുവന്റസ് ആസ്ഥാനത്തെത്തി.
ചാംപ്യന്‍സ് ലീഗ് മത്സരത്തിനിടെ ക്രിസ്റ്റ്യാനോ റൊണാള്‍ഡോ ക്ഷണിച്ചത് കൊണ്ടാണ് താരം യുവന്റസിലേക്കെത്തിയതെന്നാണ് വിലയിരുത്തല്‍.
ബാഴ്‌സലോണയിലേക്ക് പോകാന്‍ തന്നെ ആയിരുന്നു ആദ്യം ഡി ലിറ്റ് ഉദ്ദേശിച്ചിരുന്നത്.
എന്നാല്‍ ബാഴ്‌സയില്‍ സ്ഥിരം അവസരം ലഭിക്കുമെന്ന് ഉറപ്പില്ലാത്തത് കൊണ്ടാണ് താരം യുവന്റസിലെത്തിയത്.
ചാംപ്യന്‍സ് ലീഗില്‍ അയാക്‌സിന്റെ നായക സ്ഥാനത്തുണ്ടായിരുന്ന 19 കാരന്റെ മികച്ച പ്രകടനമാണ് ലോക ക്ലബുകളുടെ ശ്രദ്ധ താരത്തിലേക്കെത്തിച്ചത്.