അഗളി: മാവോയിസ്റ്റുകളെ പിടികൂടുന്നതിന് പ്രഖ്യാപിച്ച പാരിതോഷികം ഒരുവര്‍ഷമായിട്ടും ലഭിക്കാതെ പൊലിസുകാര്‍. കേരള, തമിഴ്‌നാട്, കര്‍ണാടക സര്‍ക്കാരുകള്‍ പിടികിട്ടാപ്പുള്ളിയെന്ന് പ്രഖ്യാപിച്ച മാവോയിസ്റ്റ് കാളിദാസിനെ ഒരുവര്‍ഷം മുന്‍പ് അട്ടപ്പാടിയില്‍ വച്ചാണ് അഗളി പൊലിസ് പിടികൂടിയത്.
വിവിധ സംസ്ഥാനങ്ങളിലായി 29ലധികം കേസുകളാണ് കാളിദാസിനെതിരേ ഉണ്ടായിരുന്നത്. തമിഴ്‌നാട് സര്‍ക്കാര്‍ കാളിദാസിനെ പിടികൂടുന്നവര്‍ക്ക് രണ്ടുലക്ഷം രൂപ പാരിതോഷികവും പ്രഖ്യാപിച്ചിരുന്നു. എന്നാല്‍ ഇയാള്‍ പിടിയിലായി ഒരു കൊല്ലം പിന്നിട്ടിട്ടും തമിഴ്‌നാട് സര്‍ക്കാരോ സംസ്ഥാന സര്‍ക്കാരോ കാളിദാസിനെ പിടികൂടിയവര്‍ക്ക് യാതൊരു അംഗീകാരവും നല്‍കിയിട്ടില്ല.
അഗളി ഡിവൈ.എസ്.പി ആയിരുന്ന സുബ്രഹ്മണ്യന്റെ നേതൃത്വത്തിലുള്ള ആറംഗസംഘമാണ് കാളിദാസിനെ പിടികൂടിയത്. സംസ്ഥാന ചരിത്രത്തില്‍ ആദ്യമായിട്ടാണ് ഒരു മാവോയിസ്റ്റിനെ ജീവനോടെ പിടികൂടുന്നതെന്നും പൊലിസ് പറഞ്ഞിരുന്നു.
എന്നാല്‍ ഇതിനുള്ള അംഗീകാരം അഭ്യന്തര വകുപ്പില്‍നിന്നും ലഭിച്ചിട്ടില്ലെന്ന് സേനാംഗങ്ങള്‍ പറയുന്നു. കാളിദാസിനെ പിടികൂടിയതാണെന്ന് അഗളി പൊലിസ് പറഞ്ഞുവെങ്കിട്ടും ഇദ്ദേഹം കീഴടങ്ങിയതാണെന്ന വാദവും അന്ന് സജീവമായിരുന്നു.