ന്യൂഡല്‍ഹി: പാലക്കാട് നഗരസഭയില്‍ ബി.ജെ.പി പ്രവര്‍ത്തകര്‍ ജയ് ശ്രീറാം ബാനറുയര്‍ത്തിയ സംഭവത്തില്‍ പാലക്കാട് ടൗണ്‍ പൊലിസ് കേസെടുത്ത വാര്‍ത്ത വളച്ചൊടിച്ച് എ.എന്‍.ഐ. കേസെടുത്ത സംഭവം വാര്‍ത്താ ഏജന്‍സിയായ എ.എന്‍.ഐ വസ്തുവിരുദ്ധമായി വളച്ചൊടിച്ച് റിപ്പോര്‍ട്ട് ചെയ്യുകയായിരുന്നു. ഇതിനെതിരെ രൂക്ഷ വിമര്‍ശനമുയര്‍ന്നതോടെ ഏജന്‍സി തിരുത്തി വാര്‍ത്ത നല്‍കുകയും ചെയ്തു.

പ്രധാനമന്ത്രി മോദിയുടെയും ആഭ്യന്തരമന്ത്രി അമിത് ഷായുടെയും പോസ്റ്ററുകള്‍ പാലക്കാട് മുനിസിപ്പാലിറ്റി ഓഫിസില്‍ സ്ഥാപിച്ചതിനും പാര്‍ട്ടിയെ പ്രശംസിക്കുന്ന മുദ്രാവാക്യങ്ങള്‍ വിളിച്ചതിനും ബി.ജെ.പി പ്രവര്‍ത്തകര്‍ക്കെതിരെ 153 ഐ.പി.സി വകുപ്പ് പ്രകാരം കേസ് രജിസ്റ്റര്‍ ചെയ്തു എന്നായിരുന്നു എ.എന്‍.ഐയുടെ ആദ്യ ട്വീറ്റ്. വിമര്‍ശനം ഉയര്‍ന്നുവന്നതിനെ തുടര്‍ന്ന് മണിക്കൂറുകള്‍ക്കകം ട്വീറ്റ് തിരുത്തുകയായിരുന്നു.

പാലക്കാട് മുനിസിപ്പാലിറ്റി ഓഫീസില്‍ 'ജയ് ശ്രീ റാം' എന്ന് ബാനര്‍ വെച്ചതിനെ തുടര്‍ന്ന് ഇന്ത്യന്‍ പീനല്‍ കോഡിലെ സെക്ഷന്‍ 153 ചുമത്തി ബി.ജെപി പ്രവര്‍ത്തകര്‍ക്കെതിരെ കേസെടുത്തതായാണ് രണ്ടാമത്തെ ട്വീറ്റ്. കലാപമുണ്ടാക്കാനുള്ള ഉദ്ദേശ്യത്തോടെ പ്രകോപത്തിന് ശ്രമിച്ചതിനാണ് കേസെന്ന് ബ്രാക്കറ്റില്‍ പറയുന്നുണ്ട്.

Kerala: Section 153 of Indian Penal Code (Wantonly giving provocation with intent to cause riot) has been invoked against the BJP workers for putting banner stating 'Jai Shri Ram' at Palakkad municipality office https://t.co/aef2k8eqa7

— ANI (@ANI) December 18, 2020

സംഭവത്തില്‍ സി.പി.ഐ.എമ്മും കോണ്‍ഗ്രസും പരാതി നല്‍കിയിരുന്നു. ഐ.പി.സി 153ാം വകുപ്പ് പ്രകാരമാണ് കേസെടുത്തത്. ഒരു വര്‍ഷം വരെ തടവ് കിട്ടാവുന്ന വകുപ്പാണിത്. സ്ഥാനാര്‍ത്ഥികളും കൗണ്ടിംഗ് ഏജന്റുമാരും പ്രതികളാകും. പത്തോളം പേര്‍ പ്രതികളാകുമെന്നാണ് പൊലിസ് നല്‍കുന്ന വിവരം.

തദ്ദേശ വോട്ടെണ്ണല്‍ ഫലപ്രഖ്യാപന ദിവസമായിരുന്നു സംഭവം. നഗരസഭ പിടിച്ചതിന് പിന്നാലെ നടത്തിയ ആഘോഷ പരിപാടിക്കിടെയാണ് ബി.ജെ.പി പ്രവര്‍ത്തകര്‍ ജയ് ശ്രീറാം എന്നെഴുതി, ശിവജിയുടെ ചിത്രം പതിച്ച ബാനര്‍ നഗരസഭാ കെട്ടിടത്തിന് മുന്നില്‍ ഉയര്‍ത്തിയത്.

പാലക്കാട് കേരളത്തിന്റെ ഗുജറാത്താണെന്ന് പറഞ്ഞുകൊണ്ടാണ് ബി.ജെ.പി സംസ്ഥാന വക്താവ് സന്ദീപ് വാര്യര്‍ ഇതിന്റെ വീഡിയോ പങ്കുവെച്ചത്. ബി.ജെ.പി പ്രവര്‍ത്തകരുടെ ഈ നടപടിക്കെതിരെ വ്യാപകവിമര്‍ശനമുയര്‍ന്നിരുന്നു.