തൊടുപുഴ: കരിങ്കുന്നം സെന്റ് അഗസ്റ്റിന്‍സ് ഹൈസ്‌കൂള്‍ ഗ്രൗണ്ടില്‍ നടന്ന വടം വലി മത്സരത്തെ തുടര്‍ന്നുണ്ടായ തര്‍ക്കം സംഘര്‍ഷത്തില്‍ കലാശിച്ചു. പൊലിസ് സ്ഥലത്തെത്തി രംഗം ശാന്തമാക്കി.
ഇന്നലെ വൈകിട്ട് 5 മണിയോടെയാണ് സംഭവം. സെന്റ് അഗസ്റ്റിന്‍സ് ഗ്രൗണ്ടില്‍ നടന്ന വടം വലി മത്സരത്തില്‍ കരിങ്കുന്നം സ്‌കൂള്‍ ടീമിനെ പരാജയപ്പെടുത്തി കരിമണ്ണൂര്‍ സെന്റ് ജോസഫ്‌സ് ഹൈസ്‌കൂള്‍ ടീം വിജയികളായി.
വിജയികള്‍ ട്രോഫിയുമായി തൊടുപുഴയിലേക്ക് വരുന്ന വഴി കരിങ്കുന്നം പള്ളിത്താഴത്ത് വെച്ച് ചിലര്‍ ഇവരുടെ വാഹനം തടഞ്ഞു. മത്സരത്തില്‍ പരാജയപ്പെട്ട ടീമിനെ വിജയികളോടൊപ്പം വന്ന ചിലര്‍ കളിയാക്കിയെന്നും ഇതിനെ ചോദ്യം ചെയ്യാനാണ് പള്ളിത്താഴത്ത് വെച്ച് വിജയികളുടെ വാഹനം തടഞ്ഞതെന്നും പറയപ്പെടുന്നു.
തുടര്‍ന്നുണ്ടായ വാക്കേറ്റം സംഘര്‍ഷത്തിലെത്തുകയായിരുന്നു.  സംഭവമറിഞ്ഞ് കരിങ്കുന്നം എസ്.ഐ. ക്ലീറ്റസ് മാത്യുവിന്റെ നേതൃത്വത്തില്‍ പൊലിസ് എത്തിയെങ്കിലും സംഘര്‍ഷം രൂക്ഷമാകുകയായിരുന്നു. തൊടുപുഴയില്‍ നിന്നും കൂടുതല്‍ പൊലിസെത്തി രംഗം ശാന്തമാക്കി.