റോം: ക്രിസ്റ്റ്യാനോ റൊണാള്‍ഡോ ക്ഷണിച്ചത് കൊണ്ടല്ല താന്‍ അയാക്‌സില്‍നിന്ന് യുവന്റസിലെത്തിയതെന്ന് ഡി ലിറ്റ്. യുവന്റസിലെത്തിയതിന് ശേഷം ആദ്യമായി മാധ്യമങ്ങളെ കണ്ടപ്പോഴായിരുന്നു ഡി ലിറ്റിന്റെ പ്രതികരണം.
യുവേഫ നാഷന്‍സ് ലീഗിന്റെ ഫൈനല്‍ കഴിഞ്ഞപ്പോള്‍ റൊണാള്‍ഡോ തന്നെ യുവന്റസിലേക്ക് ക്ഷണിച്ചിരുന്നു. അത് തനിക്ക് വലിയ സന്തോഷം നല്‍കി. പക്ഷെ അതല്ല താന്‍ യുവന്റസിലേക്ക് വരാന്‍ കാരണം. ഡി ലിറ്റ് വ്യക്തമാക്കി. റൊണാള്‍ഡോ ചോദിക്കുന്നതിനു മുന്‍പ് തന്നെ താന്‍ യുവന്റസിലേക്ക് വരാന്‍ തീരുമാനിച്ചിരുന്നു എന്നും ഡി ലിറ്റ് പറഞ്ഞു. കഴിഞ്ഞ സീസണില്‍ തനിക്ക് കുറേ മത്സരങ്ങള്‍ കളിക്കാന്‍ കഴിഞ്ഞെന്നും അത് പരിചയസമ്പത്തും ആത്മവിശ്വാസവും തന്നെന്നും ഡി ലിറ്റ് പറഞ്ഞു. യുവന്റസ് പരിശീലകന്‍ സാരിയുടെ സാന്നിധ്യം തന്നെ സ്വാധീനിച്ചിട്ടുണ്ടെന്നും ഡി ലിറ്റ് കൂട്ടിച്ചേര്‍ത്തു. ചാംപ്യന്‍സ് ലീഗില്‍ അയാക്‌സിന് വേണ്ടി നടത്തിയ മികച്ച പ്രകടനത്തോടെയായിരുന്നു ഫുട്‌ബോള്‍ ലോകം 19 കാരനായ താരത്തെ ശ്രദ്ധിച്ചുതുടങ്ങിയത്.