മക്ക/മദീന: ഹജ്ജിനുള്ള വിദേശ തീര്‍ഥാടകരുടെ വരവ് ശക്തമായതോടെ ഇരു പുണ്യ ഹറമുകളിലും തിരക്കേറുന്നു. ഓരോ ദിനം കഴിയുംതോറും പതിനായിരങ്ങളാണ് ലോകത്തിന്റെ വിവിധ ഭാഗങ്ങളില്‍ നിന്നും മക്കയിലും മദീനയിലുമെത്തുന്നത്.
ഇതിനാല്‍ തന്നെ മക്ക ഹറം പള്ളിയിലും മദീന മസ്ജിദുന്നബവിയിലും തീര്‍ഥാടകരുടെ ഒഴുക്കാണ്. ഇനി വെറും മൂന്നാഴ്ച മാത്രമാണ് ഹാജിമാരുടെ വരവ് അവസാനിക്കാനുള്ളത്. ഇതിനുള്ളില്‍ അഷ്ടദിക്കുകളില്‍ നിന്നുള്ള തീര്‍ഥാടകര്‍ ഇതിനുള്ളില്‍ മക്കയില്‍ എത്തിച്ചേരും. നിലവില്‍ മദീനയിലും വിദേശ തീര്‍ഥാടകര്‍ വന്നിറങ്ങുന്നുണ്ടെങ്കിലും ഇവിടെ നിശ്ചിത ദിവസം കഴിച്ചു കൂട്ടുന്ന ഇവര്‍ മക്കയിലേക്ക് തിരിക്കുന്നുണ്ട്.
നിലവില്‍ ഇന്ത്യയിലെ വിവിധ എംബാര്‍ക്കേഷന്‍ പോയിന്റുകളില്‍ നിന്നും മദീനയിലേക്കുള്ള ഹാജിമാരുടെ വരവിനു ഇന്നത്തോടെ സമാപനമാകും. ഇന്ത്യന്‍ ഹജ്ജ് കമ്മിറ്റിക്കു കീഴിലെ 63,000 തീര്‍ഥാടകരാണ് മദീനയില്‍ ഇന്നത്തോടെ ഇറങ്ങുന്നത്. ബാക്കിയുള്ള 77,000 പേര്‍ ഇന്ന് മുതല്‍ ജിദ്ദ ഹജ്ജ് ടെര്‍മിനല്‍ വഴി മക്കയിലെത്തും. ഓഗസ്റ്റ് അഞ്ചിനായിരിക്കും ഇന്ത്യന്‍ തീര്‍ഥാടകരേയും വഹിച്ചുള്ള അവസാനവിമാനം ജിദ്ദയിലെത്തുക. ജിദ്ദ വിമാനത്താവളം വഴി മക്കയിലെത്തുന്ന തീര്‍ഥാടകര്‍ ഹജ്ജ് കര്‍മത്തിനുശേഷം ഓഗസ്റ്റ് 19 മുതല്‍ മദീന സന്ദര്‍ശനത്തിന് തിരിക്കും. മദീനയില്‍ ഇന്നിറങ്ങുന്ന ഹാജിമാരുടെ അവസാന സംഘം ഇരുപത്തിയെട്ടാം തിയതിയാണ് മദീന സന്ദര്‍ശനം കഴിഞ്ഞ് മക്കയിലേക്ക് തിരിക്കുക.
തുടര്‍ന്ന് ഇന്ത്യന്‍ ഹാജിമാര്‍ പൂര്‍ണമായും മക്കയില്‍ മാത്രമായി മാറും. എട്ടു ദിന മദീന സന്ദര്‍ശനം പൂര്‍ത്തിയാക്കുന്ന തീര്‍ഥാടകരെല്ലാം മക്കയിലെത്തി ഉംറ നിര്‍വഹിക്കുന്നുണ്ട്. നിലവില്‍ ഡല്‍ഹി, ഗയ, ഗോവ എന്നിവിടങ്ങളില്‍ നിന്നുള്ള തീര്‍ഥാടകര്‍ ഇതിനകം തന്നെ എത്തിച്ചേര്‍ന്നിട്ടുണ്ട്. അഹമ്മദാബാദ്, മംഗളൂരു, കരിപ്പൂര്‍, കൊച്ചി, ഗുവാഹത്തി, മുംബൈ, ശ്രീനഗര്‍ എന്നിവിടങ്ങളിലെ തീര്‍ഥാടകരുടെ വരവാണ് പുരോഗമിക്കുന്നത്.
ഹജ്ജ് സീസണ്‍ ആരംഭിച്ചത് മുതല്‍ ഇതുവരെ പുണ്യ ഭൂമിയിലെത്തിച്ചേര്‍ന്നത് 4,32,225 തീര്‍ഥാടകരാണെന്ന് സഊദി പാസ്‌പോര്‍ട്ട് വിഭാഗം അറിയിച്ചു. ഓഗസ്റ്റ് ഏഴിനാണ് അവസാന ഹജ്ജ് വിമാനം.