തിരുവനന്തപുരം: ആര്‍ദ്രം മിഷന്റെ ജില്ലാതല അവലോകനം യോഗം ജില്ലാ പഞ്ചായത്ത് പ്രസിഡന്റ് വി.കെ. മധു ഉദ്ഘാടനം ചെയ്തു. ആര്‍ദ്രം മിഷനിലൂടെ സാധാരണ രോഗികള്‍ക്ക് ഗുണനിലവാരമുള്ള ആതുരസേവനം, രോഗീ സൗഹൃദ സാഹചര്യത്തില്‍ ലഭ്യമാക്കാന്‍ സഹായിക്കുമെന്ന് വി.കെ മധു അഭിപ്രായപ്പെട്ടു. മുഴുവന്‍ ആരോഗ്യവകുപ്പ് ഉദ്യോഗസ്ഥരും ആര്‍ദ്രം മിഷന്റെ വിജയകരമായ നടത്തിപ്പിന് പ്രയത്‌നിക്കണമെന്ന് ജില്ലാ പഞ്ചായത്ത് സ്റ്റാന്‍ഡിങ് കമ്മിറ്റി ചെയര്‍മാന്‍ വി. രഞ്ജിത് ആവശ്യപ്പെട്ടു.
ജില്ലയില്‍ ആര്‍ദ്രം കുടുംബാരോഗ്യ കേന്ദ്രങ്ങളായി തിരഞ്ഞെടുക്കപ്പെട്ട 16 ആരോഗ്യ കേന്ദ്രങ്ങളുടെ പരിമിതികള്‍ ചര്‍ച്ച ചെയ്യുന്നതിനും പദ്ധതി രൂപരേഖ തയ്യാറാക്കുന്നതിനും ഡെങ്കിപ്പനിക്കെതിരായ പ്രതിരോധ പ്രവര്‍ത്തനങ്ങള്‍ ശക്തി പ്പെടുത്തുന്നതിനും ആരോഗ്യസേന രൂപീകരിക്കുന്നതിനുമായി ദേശീയ ആരോഗ്യ ദൗത്യവും ആരോഗ്യ വകുപ്പും സംയുക്തമായാണ് യോഗം ചേര്‍ന്നത്.
ജില്ലയിലെ ഡെങ്കിപ്പനി പ്രതിരോധിക്കുന്നതിനായി വിവധ സംഘടകളെ ഉള്‍പ്പെടുത്തി ആരോഗ്യ സേന രൂപീകരിക്കാന്‍ ജില്ലാ മെഡിക്കല്‍ ഓഫിസര്‍ ഡോ.ജോസ് ഡിക്രൂസ് നിര്‍ദേശിച്ചു. കുടുംബാരോഗ്യ കേന്ദ്രങ്ങളുടെ പദ്ധതി അവലോകനം നടത്തിയ എന്‍.എച്ച്.എം ജില്ലാ പ്രോഗ്രാം മാനേജര്‍ ഡോ.ജെ.സ്വപ്നകുമാരി ആര്‍ദ്രം പദ്ധതിയുടെ വിജയകരമായ നടത്തിപ്പിനായി എല്ലാ തദ്ദേശ സ്വയംഭരണ സ്ഥാപന മേധാവികളും പങ്കാളികളാകണമെന്ന് ആവശ്യപ്പെട്ടു. യോഗത്തില്‍ ശുചിത്വ മിഷന്‍ പ്രതിനിധി ഹരി, ഡോ.ദിവ്യ, ഡോ.വിജയകുമാര്‍ എന്നിവര്‍ വിഷയാവതരണം നടത്തി. പഞ്ചായത്ത് പ്രസിഡന്റുമാര്‍ , ആരോഗ്യ സ്റ്റാന്‍ഡിങ് കമ്മിറ്റി ചെയര്‍മാന്‍മാര്‍, മെഡിക്കല്‍ ഓഫിസര്‍മാര്‍, ഹെല്‍ത്ത് ഇന്‍സ്‌പെക്ടര്‍മാര്‍, പി.ആര്‍.ഒ മാര്‍ എന്നിവര്‍ പങ്കെടുത്തു.