കൊച്ചി: കൊച്ചിയിലെ പ്രമുഖ ഷോപ്പിങ് മാളില്‍ വെച്ച് യുവനടിയെ അപമാനിച്ച സംഭവത്തില്‍ പ്രതികളെ തിരിച്ചറിഞ്ഞു. മലപ്പുറം പെരിന്തല്‍മണ്ണ സ്വദേശികളായ ഇര്‍ഷാദ്, ആദില്‍ എന്നിവരാണ് പ്രതികള്‍. ഇന്ന് ഇരുവരേയും അറസ്റ്റ് ചെയ്‌തേക്കും.

ഇന്നലെ പ്രതികളുടെ സി.സിടിവി ദൃശ്യങ്ങള്‍ പൊലിസ് പുറത്തുവിട്ടിരുന്നു. മാളിന്റെ കവാടത്തില്‍ പേരും മൊബൈല്‍ നമ്പറും നല്‍കാതെ ഇവര്‍ ദുരുദ്ദേശ്യത്തോടെയാണ് എത്തിയതെന്നു പൊലീസ് കരുതുന്നു.

കൊച്ചിയിലെ പ്രമുഖ ഷോപ്പിംഗ് മാളില്‍ വ്യാഴാഴ്ച വൈകുന്നേരമാണ് സംഭവം നടന്നത്. നടി സമൂഹമാധ്യമത്തിലൂടെ ഇക്കാര്യം അറിയിച്ചത്. നടിയും സഹോദരിയും മാതാവും ഒരു ബന്ധുവുമാണ് ഇടപ്പള്ളയിലെ മാളിലെത്തിയത്. നടിയും സഹോദരിയും ഹൈപ്പര്‍ മാര്‍ക്കറ്റില്‍ നില്‍ക്കുമ്പോഴാണ് രണ്ട് യുവാക്കളെത്തിയത്. മാതാവും ബന്ധുവും മറ്റൊരു ഷോപ്പിലായിരുന്നു.

മാളില്‍ ഒട്ടും തിരക്കില്ലാതിരുന്നിട്ടും രണ്ടു പേര്‍ വന്ന് മനപ്പൂര്‍വം ശരീരത്ത് ഇടിക്കുകയും സ്പര്‍ശിക്കുകയും ചെയ്തെന്ന് നടി പറയുന്നു. സഹോദരി ശ്രദ്ധയില്‍ പെടുത്തിയപ്പോഴാണ് നോക്കിയത്. അന്നേരത്തെ ഷോക്കില്‍ എന്ത് ചെയ്യണമെന്ന് അറിയില്ലായിരുന്നു. കൗണ്ടറില്‍ ചെന്നപ്പോള്‍ യുവാക്കള്‍ അടുത്ത് വന്ന് സംസാരിക്കാന്‍ ശ്രമിച്ചു. അന്നേരം താന് ഉച്ചത്തില്‍ സംസാരിച്ചതോടെ അവര്‍ സ്ഥലം വിടുകയായിരുന്നെന്നും നടി പറയുന്നു.