പാനൂര്‍: വ്യാജ വാഹനാപകടമുണ്ടാക്കി പണം തട്ടിയ സംഘത്തിലെ മുഖ്യകണ്ണി പിടിയില്‍. പുതിയതെരു ആശാരി കമ്പനിക്ക് സമീപത്തെ മുബാറക്കിനെ (22)യാണ് കതിരൂര്‍ എസ്.ഐ സാജുവും സംഘവും പിടികൂടിയത്. ബൈക്കില്‍ സഞ്ചരിക്കുകയായിരുന്ന ആമ്പിലാട് നമ്പ്യത്ത് വീട്ടില്‍ ബിനീഷിന്റെ പക്കലില്‍നിന്നുമാണ് രണ്ടുലക്ഷം രൂപ മുബാറക്കിന്റെ നേതൃത്വത്തിലുള്ള സംഘം കവര്‍ന്നത്. കഴിഞ്ഞ 23ന് കതിരൂര്‍ ഡയമണ്ട് മുക്കില്‍ വച്ചാണ് സംഭവം.
ബൈക്കില്‍ പണവുമായി സഞ്ചരിക്കുകയായിരുന്ന ബിനീഷിനെ കാറില്‍ യാത്ര ചെയ്തിരുന്ന മുബാറക്കിന്റെ നേതൃത്വത്തിലുള്ള സംഘം കാര്‍കൊണ്ട് ഇടിച്ചു വീഴ്ത്തുകയും ആശുപത്രിയില്‍ കൊണ്ടുപോകുന്നെന്ന വ്യാജേന കാറില്‍ തട്ടിക്കൊണ്ട് പോവുകയും കയ്യിലുണ്ടായിരുന്ന പണം തട്ടിയെടുക്കുകയുമായിരുന്നു.
പിടിയിലായ തട്ടിപ്പ് സംഘത്തിലെ മുഖ്യപ്രതി മുബാറക്ക് അഞ്ച് വധശ്രമ കേസ് ഉള്‍പ്പെടെ നിരവധി ക്രിമിനല്‍ കേസില്‍ പ്രതിയാണ്. മുബാറക്കിനെ തലശേരി കോടതിയില്‍ ഹാജരാക്കി. സംഭവത്തിലുള്‍പ്പെട്ട മറ്റ് പ്രതികള്‍ക്കു വേണ്ടി കതിരൂര്‍ പൊലിസ് അന്വേഷണം ഊര്‍ജിതമാക്കിയിട്ടുണ്ട്.