തിരൂര്‍: വീട്ടുമുറ്റത്തു നിര്‍ത്തിയിട്ട ആക്ടീവ സ്‌കൂട്ടര്‍ അര്‍ധരാത്രിയില്‍ തീപിടിച്ചു നശിച്ചു. നിറമരുതൂര്‍ കുമാരന്‍പടിയിലെ കളത്തിങ്ങല്‍ ഇസ്മാഈലിന്റെ സ്‌കൂട്ടറാണ് ദുരൂഹസാഹചര്യത്തില്‍ പൂര്‍ണമായും കത്തിനശിച്ചത്. വെള്ളിയാഴ്ച അര്‍ധരാത്രിയാണ് സംഭവം.ഇസ്മാഈലിന്റെ മകന്‍ കിടന്നുറങ്ങുന്നതിനിടെ പെട്ടെന്നു കനത്ത് ചൂട് അനുഭവപ്പെട്ടതിനെ തുടര്‍ന്നു ജനല്‍ കര്‍ട്ടണ്‍ മാറ്റിനോക്കിയപ്പോള്‍ സ്‌കൂട്ടറില്‍നിന്ന് തീ ആളിപ്പടരുന്നതു കാണുകയായിരുന്നു. വിവരമറിഞ്ഞെത്തിയ അയല്‍വാസികള്‍ ചേര്‍ന്ന് തീയണക്കാന്‍ ശ്രമിക്കുമ്പോഴേക്കും വാഹനം പൂര്‍ണമായും കത്തിനശിച്ചിരുന്നു. വീടിനു സമീപത്തുനിന്ന് പെട്രോള്‍ കുപ്പിയും ലൈറ്ററും കണ്ടെത്തിയിട്ടുണ്ട്. പരാതി പ്രകാരം താനൂര്‍ പൊലിസ് സ്ഥലത്തെത്തി പരിശോധന നടത്തി.