തിരുവനന്തപുരം: ഡല്‍ഹി മുന്‍മുഖ്യമന്ത്രി ഷീലാദീക്ഷിതിന്റെ നിര്യാണത്തില്‍ ഗവര്‍ണര്‍ പി. സദാശിവം, മുഖ്യമന്ത്രി പിണറായി വിജയന്‍, പ്രതിപക്ഷ നേതാവ് രമേശ് ചെന്നിത്തല, സ്പീക്കര്‍ പി. ശ്രീരാമകൃഷ്ണന്‍, കെ.പി.സി.സി പ്രസിഡന്റ് മുല്ലപ്പള്ളി രാമചന്ദ്രന്‍, മുന്‍ മുഖ്യമന്ത്രി ഉമ്മന്‍ചാണ്ടി എന്നിവര്‍ അനുശോചിച്ചു.
ഷീലാ ദീക്ഷിതിന്റെ വിയോഗം കോണ്‍ഗ്രസിന് തീരാനഷ്ടമെന്ന് കെ.പി.സി.സി പ്രസിഡന്റ് മുല്ലപ്പള്ളി രാമചന്ദ്രന്‍ അനുശോച ന സന്ദേശത്തില്‍ പറഞ്ഞു. സജീവ രാഷ്ട്രീയത്തില്‍ വന്നകാലം മുതല്‍ അവരുമായി ആത്മബന്ധമുണ്ടായിരുന്നു.
പ്രവര്‍ത്തിച്ച മേഖലകളിലെല്ലാം വ്യക്തിമുദ്ര പതിപ്പിക്കാന്‍ അവര്‍ക്കു കഴിഞ്ഞിട്ടുണ്ട്. ഏറ്റവും ഒടുവില്‍ സ്ഥാനാര്‍ഥി നിര്‍ണയവുമായി ബന്ധപ്പെട്ട് ഡല്‍ഹിയില്‍ വച്ചായിരുന്നു അവസാനമായി അവരെ കണ്ടുമുട്ടിയതെന്നും മുല്ലപ്പള്ളി പറഞ്ഞു