വാടാനപ്പള്ളി: രണ്ട് വാഹനങ്ങളിലായി വില്‍പനക്ക് കൊണ്ടുവന്ന മുപ്പത്തി അഞ്ച് ലക്ഷം രൂപ വിലവരുന്ന എഴുപത് കിലോ കഞ്ചാവ് വലപ്പാട് പൊലിസ് പിടികൂടി. സംഭവത്തില്‍ നിരവധി മോഷണ കേസുകളിലെ പ്രതി ഉള്‍പ്പെടെ നാലംഗ സംഘത്തെ അറസ്റ്റ് ചെയ്തു. കൊല്ലം കൊട്ടാരക്കര നെല്ലിക്കുന്ന് മൊട്ടക്കാട്ടില്‍ രാജേന്ദ്രന്‍ (ഗ്യാസ് രാജേന്ദ്രന്‍ 54), ഇടുക്കി സ്വദേശികളായ രാജാക്കാട് ഏലക്കല്ല് തേക്കിന്‍ കാനം കാഞ്ഞിരത്തിങ്കല്‍ അനില്‍ (44), വാത്തിക്കുടി ബഥേല്‍ കോണിപ്പാട്ട് ഷിജു (44), കൊന്നത്തടി കല്ലേപുളിക്കല്‍ പവിത്രന്‍ (49) എന്നിവരാണ് അറസ്റ്റിലായത്. ഇവര്‍ കഞ്ചാവ് കടത്താന്‍ ഉപയോഗിച്ച പിക്കപ്പ്‌വാനും കാറും പൊലിസ് പിടികൂടിയിട്ടുണ്ട്. ഇന്നലെ ഉച്ചക്ക് രണ്ടരയോടെ കോതകുളം ബീച്ചില്‍നിന്നാണു കഞ്ചാവ് സഹിതം സംഘത്തെ പിടികൂടിയത്. ഫോര്‍ഡ് ഫീഗോ കാറില്‍നിന്ന് പത്ത് കഞ്ചാവ് പൊതികളും, മഹീന്ദ്ര പിക്കപ്പ് വാനിന്റെ പ്ലാറ്റ് ഫോമില്‍ പ്രത്യേക അറയുണ്ടാക്കി സൂക്ഷിച്ച 23 പൊതികളും, പൊളിത്തീന്‍ കവറിലായി കാറില്‍ കണ്ടെത്തിയ അഞ്ചു പൊതികളുമാണ് പിടികൂടിയത്. രഹസ്യ വിവരം ലഭിച്ചതിനെ തുടര്‍ന്ന് ഇന്നലെ ഉച്ചക്ക് രണ്ട് പൊലിസുകാര്‍ മഫ്തിയില്‍ കോതകുളം ബീച്ചില്‍ കാത്തുനില്‍ക്കേ രണ്ട് മണിയോടെ ഫോര്‍ഡ് കാര്‍ എത്തുകയായിരുന്നു. അല്‍പം കഴിഞ്ഞ് പിക്കപ്പ് വാനുമെത്തി ഈ വാഹനത്തിനു പിന്നില്‍ പൊലിസ് ജീപ്പുമെത്തി.
ഒഡീഷയില്‍നിന്ന് കൊണ്ടുവന്ന കഞ്ചാവ് കച്ചവടക്കാര്‍ക്ക് കൈമാറാനായി കാത്തുനില്‍ക്കുമ്പോഴാണ് ഇവര്‍ പിടിയിലായത്. വലപ്പാട് സി.ഐ സി.ആര്‍ സന്തോഷ്, എസ്.ഐ ഇ.ആര്‍ ബൈജു, ഗ്രേഡ് എസ്.ഐ രാമകൃഷ്ണന്‍, എ.എസ്.ഐ സലീലകുമാര്‍, എസ്.സി.പി.ഒമാരായ അനില്‍കുമാര്‍, റഫീഖ്, ജലീല്‍, പ്രത്യേക അന്വേഷണ സംഘാംഗങ്ങളായ ഷൈന്‍, അനന്തകൃഷ്ണന്‍, രാജേഷ്, ബിബീഷ് എന്നിവരടങ്ങിയ സംഘമാണ് കഞ്ചാവ് പിടികൂടിയത്.