കുന്ദമംഗലം: മര്‍കസ് വിദ്യാഭ്യാസ തട്ടിപ്പിനിരയായ വിദ്യാര്‍ഥികള്‍ നടത്തുന്ന നിരാഹാരസമരത്തെ പൊലിസിനെ ഉപയോഗിച്ച് അടിച്ചമര്‍ത്താനാവില്ലെന്ന് കുന്ദമംഗലത്ത് ഇന്നലെ ചേര്‍ന്ന സര്‍വകക്ഷി ആക്ഷന്‍ കമ്മിറ്റി യോഗം അഭിപ്രായപ്പെട്ടു.
കഴിഞ്ഞദിവസം സമരക്കാര്‍ക്ക് നേരെയുണ്ടായ പൊലിസ് അതിക്രമത്തില്‍ യോഗം ശക്തമായി പ്രതിഷേധിച്ചു. ലാത്തിച്ചാര്‍ജിനും ഗ്രനേഡ്, ടിയര്‍ഗ്യാസ് പ്രയോഗത്തിനും മുന്‍പ് ഉണ്ടായിരിക്കേണ്ട നടപടിക്രമങ്ങള്‍ പൊലിസ് പാലിച്ചില്ലെന്ന് ആക്ഷന്‍ കമ്മിറ്റി ആരോപിച്ചു.
യാതൊരു പ്രകോപനവുമില്ലാതെ സംഭവസമയത്ത് മര്‍കസില്‍നിന്ന് പുറത്തുവന്ന ഒരു പൊലിസ് ഉദ്യോഗസ്ഥനാണ് പെട്ടെന്ന് സമരപ്പന്തല്‍ പൊളിച്ചുനീക്കിയതും സമരം ചെയ്ത വിദ്യാര്‍ഥികളെ തല്ലിച്ചതയ്ക്കുകയും ചെയ്തത്. പൊലിസ് നടപടിയെക്കുറിച്ച് സമഗ്രമായി അന്വേഷിച്ച് കുറ്റക്കാരായ ഉദ്യോഗസ്ഥര്‍ക്കെതിരേ നടപടിയെടുക്കണമെന്നും യോഗം ആവശ്യപ്പെട്ടു.
പൊളിച്ചുമാറ്റിയ സമരപ്പന്തല്‍ വീണ്ടും സ്ഥാപിക്കാനും സമരം ശക്തമായി തുടരാനും യോഗം തീരുമാനിച്ചു.
പി വിശ്വനാഥന്‍ അധ്യക്ഷനായി. ഖാലിദ് കിളിമുണ്ട, ഒ. സുഭദ്രന്‍, ഇ.പി അന്‍വര്‍ സാദത്ത്, എം. ബാബുമോന്‍ സംസാരിച്ചു. അബ്ദുല്‍ ജബ്ബാര്‍ സ്വാഗതവും അബ്ദുല്‍ വാഹിദ് നന്ദിയും പറഞ്ഞു.

എട്ടു വിദ്യാര്‍ഥികള്‍ റിമാന്‍ഡില്‍

കുന്ദമംഗലം: മര്‍ക്കസ് എന്‍ജിനീയറിങ്ങ് ടെക്‌നോളജി കോഴ്‌സ് വിവാദവുമായി ബന്ധപ്പെട്ട് കഴിഞ്ഞ ദിവസം നടന്ന അക്രമ സംഭവത്തില്‍ എട്ടു വിദ്യാര്‍ഥികള്‍ റിമാന്റില്‍. എ.ടി റിന്‍ഷാദ് (21), മുഹമ്മദ് അജ്‌ലാല്‍ (23), മുഹമ്മദ് റാഷിദ്(22), എളയടത്ത് താഴം അനസ്(23), കണ്ണമ്പലം കെ. ജംഷാദ് (25), കൂനഞ്ചേരി പുതുക്കുടി ഷാനിദ്(21), ബാലുശ്ശേരി മുത്തമ്മക്കണ്ടി എം.കെ മുഹമ്മദ് മിര്‍ഷാദ്, ഒവുങ്ങര സി.പി നിയാസ് എന്നിവരെയാണ് കുന്ദമംഗലം പൊലിസ് അറസ്റ്റ് ചെയ്തത്. ഇവരെ കുന്ദമംഗലം ജുഡിഷ്യല്‍ ഒന്നാം ക്ലാസ് മജിസ്‌ട്രേട്ട് കോടതി 14 ദിവസത്തേക്ക് റിമാന്‍ഡ് ചെയ്തു.