കൊടുവള്ളി: സ്‌കൂട്ടറപകടത്തില്‍ നവവരന്‍ മരിച്ചു. കൊടുവള്ളി മാനിപുരം കുണ്ടത്തില്‍ കെ.പി അലിയുടെ മകന്‍ മുഹമ്മദ് റാഷിദ് (23) ആണ് മരിച്ചത്.

ബുധനാഴ്ച വൈകിട്ട് 5.45ഓടെ കൊടുവള്ളി ഓമശ്ശേരി റോഡില്‍ ഒതയോത്തിനും മുത്തമ്പലത്തിനുമിടയില്‍ വെളിച്ചണ്ണ മില്ലിനടുത്താണ് അപകടം. ഒരു മാസം മുമ്പാണ് റാഷിദിന്റെ വിവാഹം കഴിഞ്ഞത്.

മാനിപുരത്ത് നിന്ന് കൊടുവള്ളി ഭാഗത്തേക്ക് വരുന്നതിനിടെയാണ് റാഷിദ് സഞ്ചരിച്ചിരുന്ന സ്‌കൂട്ടര്‍ അപകടത്തില്‍പ്പെട്ടത്.

സ്വകാര്യ മിനി ബസ് സ്‌കൂട്ടറില്‍ തട്ടിയാണ് അപകടമുണ്ടായതെന്ന് കൊടുവള്ളി പൊലിസ് പറഞ്ഞു.

അതേ സമയം ബസ് സ്‌കൂട്ടറില്‍ ഇടിച്ചിട്ടില്ലെന്നാണ് ബസ് ജീവനക്കാരുടെ ഭാഷ്യം. കൂടുതല്‍ അന്വേഷണങ്ങള്‍ നടന്നുവരികയാണെന്ന് പൊലിസ് പറഞ്ഞു.

ഗുരുതര പരിക്കേറ്റ മുഹമ്മദ് റാഷിദിനെ നാട്ടുകാര്‍ ഉടന്‍ കോഴിക്കോട് മെഡിക്കല്‍ കോളേജ് ആശുപത്രിയില്‍ എത്തിച്ചെങ്കിലും രക്ഷിക്കാനായില്ല.

ദുബൈ ലുലു മാളിലെ ജീവനക്കാരനായിരുന്നു. സക്കീനയാണ് റാഷിദിന്റെ മാതാവ്. ഭാര്യ: മുബഷിറ. സഹോദരങ്ങള്‍: റിഷാന, റാഷിന, റാഷിദ, മുഹമ്മദ് റാഫി. ഖബറടക്കം വ്യാഴാഴ്ച ഉച്ചയോടെ കാക്കാടന്‍ച്ചാലില്‍ പള്ളി ഖബറിസ്ഥാനില്‍.