വിശുദ്ധ റമദാന്‍ ദോഷങ്ങളെ കരിച്ചുകളയാനുള്ളതാണ്. സ്രഷ്ടാവായ അല്ലാഹുവിലേക്കു സമര്‍പ്പിക്കുന്നതിലൂടെ ആത്മാവിനെ ശുദ്ധീകരിക്കാനുള്ള കാലയളവാണിത്. അല്ലാഹു പറയുന്നു-'സത്യ വിശ്വാസികളേ, നിങ്ങളുടെ മുന്‍പുള്ളവരുടെ മേല്‍ നിര്‍ബന്ധമാക്കപ്പെട്ടപോലെ നിങ്ങളുടെ മേലിലും നോമ്പ് നിര്‍ബന്ധമാക്കപ്പെട്ടിരിക്കുന്നു, നിങ്ങള്‍ സൂക്ഷ്മതയുള്ളവരാകാന്‍ വേണ്ടി' (ഖുര്‍ആന്‍ 2-183).
ആത്മശുദ്ധീകരണമാണ് വ്രതനുഷ്ഠാനത്തിലൂടെ ലക്ഷ്യമിടുന്നത്. ദുര്‍ചിന്തകളില്‍നിന്നും ദുര്‍പ്രവര്‍ത്തനങ്ങളില്‍നിന്നും മനസിനെയും ശരീരത്തെയും സംസ്‌കരിച്ചെടുക്കണം. ആരാധനകളിലൂടെയാണ് സൂക്ഷമതയും വിജയവും  കൈവരിക്കാനാകുന്നത്. വിശപ്പു സഹിച്ചും ഉറക്കമൊഴിച്ചും നിരന്തര കര്‍മങ്ങളിലൂടെയും തഖ്‌വ കൈവരിക്കാന്‍ സല്‍ക്കര്‍മങ്ങളുടെ മാസമായ റമദാന്‍ കൂടുതല്‍ ഉപയോഗപ്പെടുത്തണം.
റമദാനിലെ പ്രധാന ആരാധനാ കര്‍മമാണല്ലോ വ്രതാനുഷ്ഠാനം. ആത്മീയ ചൈതന്യം ഉള്‍ക്കൊള്ളുന്നതാകണം നോമ്പ്. തഖ്‌വയില്ലാത്ത, കേവല ഭക്ഷണപദാര്‍ഥങ്ങളില്‍നിന്നു മാറിനില്‍ക്കുന്നതില്‍ പ്രയോജനമില്ല. വ്രതാനുഷ്ഠാനത്തിനൊപ്പം തിന്‍മകളില്‍നിന്നെല്ലാം അകലം പാലിക്കണം. അതു ജീവിതചര്യയായി തുടരുകയും വേണം.
റമദാനില്‍ അനേകം മടങ്ങ് പ്രതിഫലമാണ് അല്ലാഹു നിശ്ചയിച്ചിരിക്കുന്നത്. നബി (സ്വ) പറയുന്നു-'ഈ മാസത്തില്‍ ആരെങ്കിലും ഒരു സുന്നത്ത് ചെയ്താല്‍ മറ്റു മാസങ്ങളില്‍ ഒരു ഫര്‍ള് ചെയ്തതു പോലെയാണ്. വല്ലവനും ഒരു ഫര്‍ളായ കാര്യം നിര്‍വഹിച്ചാല്‍ മറ്റു മാസങ്ങളില്‍ എഴുപതു ഫര്‍ളുകള്‍ നിര്‍വഹിച്ചതു പോലെയും'.
പൈശാചിക പ്രവണതകളെ തിരസ്‌കരിക്കുകയും കര്‍മാനുഷ്ഠാനങ്ങളില്‍ സൂക്ഷമത കൈവരിക്കുകയും വേണം. നബി(സ) പറഞ്ഞു- 'അഞ്ചു കാര്യങ്ങള്‍ നോമ്പിനെ നഷ്ടപ്പെടുത്തിക്കളയും, ഏഷണി, പരദൂഷണം, കള്ളസത്യം, വികാരത്തോടെയുള്ള നോട്ടം, കളവ് പറയല്‍ എന്നിവയാണവ'. നോമ്പിന്റെ പ്രതിഫലം നഷ്ടമാകുന്ന വിധമുള്ള സംസാരങ്ങളും പ്രവൃത്തികളും ഉപേക്ഷിക്കണം. തിരുനബി (സ) യുടെ മറ്റൊരു ഹദീസ് ഇപ്രകാരമാണ്- 'നിങ്ങളിലൊരാള്‍ക്കു വ്രതാനുഷ്ഠാന ദിനം വന്നാല്‍ ദുഷിച്ച വാക്കുകള്‍ പറയുകയോ അനാവശ്യം സംസാരിക്കുകയോ ചെയ്യരുത്.
അവനെ വല്ലവനും ചീത്ത പറയുകയോ കൈയേറ്റം ചെയ്യാന്‍ ഒരുമ്പെടുകയോ ചെയ്താല്‍ താന്‍ നോമ്പുകാരനാണെന്നു പറഞ്ഞുകൊള്ളട്ടെ' (ബുഖാരി, മുസ്‌ലിം). സ്വര്‍ഗ വാതിലുകളിലൊന്നു നോമ്പുകാരനുവേണ്ടി മാത്രമായി തുറന്നുവച്ചിരിക്കുന്നു. കാരുണ്യവും പാപമോചനം, നരക മോചനം എന്നിവയുമാണ് ഈ മാസം നമുക്കു നല്‍കുന്നത്. മൂന്നു പത്തുകളിലായി ഈ വിശേഷ നേട്ടം കൈവരിക്കാന്‍ പര്യാപ്തമാകണം നമ്മുടെ കര്‍മങ്ങള്‍. വ്രതാനുഷ്ഠാനത്തിലൂടെയും ഖുര്‍ആന്‍ പാരായണം, തറാവീഹ് നിസ്‌കാരം, ദാന ധര്‍മങ്ങള്‍, ഇതര ആരാധനകള്‍ എന്നിവയിലൂടെ സംശുദ്ധമായ ജീവിതത്തിനു റമദാന്‍ കാലം ഉപയോഗിപ്പെടുത്തുക. അല്ലാഹു അനുഗ്രഹിക്കട്ടെ, ആമീന്‍.
                          
    (സമസ്ത മലപ്പുറം ജില്ലാ  ജനറല്‍ സെക്രട്ടറിയാണ് ലേഖകന്‍)