ന്യൂഡല്‍ഹി: നേതൃത്വവുമായുള്ള അഭിപ്രായ ഭിന്നതയെ തുടര്‍ന്ന് കോണ്‍ഗ്രസ് സാമൂഹിക മാധ്യമ മേധാവി സ്ഥാനത്തു നിന്ന് ദിവ്യ സ്പന്ദന രാജിവച്ചുവെന്ന വാര്‍ത്ത അവര്‍ നിഷേധിച്ചു. അവര്‍ രാജിവയ്ക്കുകയോ അല്ലെങ്കില്‍ തല്‍സ്ഥാനത്തു നിന്ന് മാറ്റുകയോ ചെയ്തുവെന്നാണ് വാര്‍ത്ത പുറത്തു വന്നിരുന്നത്.
നേതൃത്വവുമായി അഭിപ്രായ വ്യത്യാസമുണ്ടെന്നും ഇതേ തുടര്‍ന്ന് കോണ്‍ഗ്രസില്‍ നിന്ന് രാജിവച്ച് ബി.ജെ.പിയിലേക്ക് പോകുന്നുവെന്ന രീതിയിലാണ് വാര്‍ത്ത വന്നതെന്ന് അവര്‍ പറഞ്ഞു.
കഴിഞ്ഞ മൂന്നു ദിവസം അവര്‍ പ്രവര്‍ത്തന രംഗത്ത് സജീവമായിരുന്നില്ല. ഇതാണ് അവര്‍ രാജിവച്ചതായും തല്‍സ്ഥാനത്ത് നിന്ന് നീക്കിയതായുമുള്ള വാര്‍ത്തകള്‍ പുറത്തുവരാന്‍ കാരണമായത്.
ഏതാനും ദിവസങ്ങള്‍ക്ക് മുന്‍പ് പ്രധാനമന്ത്രിക്കെതിരായി അവര്‍ നടത്തിയ പരാമര്‍ശത്തെ തുടര്‍ന്ന് രാജ്യദ്രോഹ കുറ്റത്തിന് കേസെടുത്തിരുന്നു.