ന്യൂഡല്‍ഹി: റാഫേല്‍ യുദ്ധവിമാന കരാറില്‍ ഓഫ്‌സെറ്റ് പങ്കാളിയെ തെരഞ്ഞെടുത്തതില്‍ സര്‍ക്കാരിനോ വ്യോമസേനയ്‌ക്കോ പങ്കില്ലെന്ന് തലവന്‍ ബിരേന്ദര്‍ സിങ് ധനോവ. റാഫേല്‍ നിര്‍മാതാക്കളായ ദാസോള്‍ ഏവിയേഷനാണ് ഇതു സംബന്ധിച്ച തീരുമാനമെടുക്കുന്നത്.
36 യുദ്ധവിമാനങ്ങള്‍ ഉചിതമായ രീതിയില്‍ ഏറ്റെടുക്കുന്നതു സംബന്ധിച്ച തീരുമാനങ്ങള്‍ക്ക് മാത്രമാണ് ദാസോള്‍ വ്യോമസേനയെ സമീപിച്ചിട്ടുള്ളത്. റാഫേല്‍ ഒരു വലിയ മാറ്റത്തിന്റെ തുടക്കമാകും. വിവിധ രീതിയില്‍ ഇന്ത്യയ്ക്ക് ഏറെ ഗുണകരമാണ് ഈ കരാര്‍. രാജ്യത്തിന്റെ പ്രതിരോധ ശേഷി ശക്തിപ്പെടുത്തുന്നതിന്റെ ഒരു ഘട്ടം മാത്രമാണ് ഇതെന്നും അദ്ദേഹം പറഞ്ഞു.
2015ല്‍ പ്രധാനമന്ത്രി നരേന്ദ്ര മോദിയും ഫ്രഞ്ച് മുന്‍ പ്രസിഡന്റ് ഫ്രാന്‍സ്വ ഹൊളാന്ദേയും ഒപ്പിട്ട കരാറിനെ ചൊല്ലി രാഷ്ട്രീയ വിവാദങ്ങള്‍ പുകയുന്നതിനിടയിലാണ് വ്യോമസേന തലവന്റെ പ്രതികരണം. അനില്‍ അംബാനിയുടെ റിലയന്‍സ് ഡിഫന്‍സിനെ ഓഫ്‌സെറ്റ് പങ്കാളിയാക്കുന്നതില്‍ ഫ്രാന്‍സിന്റെ ഭാഗത്തുനിന്ന് യാതൊരു ഇടപെടലും ഉണ്ടണ്ടായിട്ടില്ല. പ്രതിപക്ഷ കക്ഷികള്‍ ആരോപിക്കുന്ന രീതിയില്‍ ഹിന്ദുസ്ഥാന്‍ ഏയ്‌റോനോട്ടിക്‌സ് ലിമിറ്റഡ് (എച്ച്.എ.എല്‍) കരാറില്‍നിന്ന് ഇതുവരെയും പുറത്തായിട്ടില്ലെന്ന് ബിരേന്ദര്‍ സിങ് ധനോവ പറഞ്ഞു.
മൊത്ത ഉല്‍പാദന ലക്ഷ്യം കൈവരിക്കുന്ന കമ്പനിയാണ് എച്ച്.എ.എല്‍. എന്നാല്‍ പദ്ധതി പൂര്‍ത്തീകരിച്ച് കൈമാറുന്നതില്‍ അവര്‍ എപ്പോഴും കാലതാമസം നേരിടുന്നതാണ് മുന്‍കാല അനുഭവം. സുഖോയ് 30, ജാഗ്വാര്‍, മിറാഷ് -200 എന്നീ പദ്ധതികളിലെല്ലാം അത് നമ്മള്‍ കണ്ടണ്ടതാണെന്നും ധനോവ പറഞ്ഞു.