ന്യൂഡല്‍ഹി: ലഷ്‌കറെ ത്വയ്ബ ഭീകരര്‍ ഇന്ത്യയിലെത്തിയിട്ടുണ്ടെന്ന രഹസ്യാന്വേഷണ വിഭാഗത്തിന്റെ റിപ്പോര്‍ട്ടിനെത്തുടര്‍ന്ന് ഡല്‍ഹി, മുംബൈ ഉള്‍പ്പെടെയുള്ള മെട്രോ നഗരങ്ങളില്‍ അതീവ ജാഗ്രതാ നിര്‍ദേശം.
മെട്രോ നഗരങ്ങള്‍ കേന്ദ്രീകരിച്ച് ആക്രമണം ഉണ്ടായേക്കുമെന്ന മുന്നറിയിപ്പും ഉണ്ട്. 20 ഭീകരര്‍ ഇന്ത്യയില്‍ എത്തിയിട്ടുണ്ടെന്നാണ് വിവരം. ഡല്‍ഹിയില്‍ മെട്രോ പൊലിസ്, റെയില്‍വേ പൊലിസ് എന്നിവരാണ് ജില്ലാ ആഭ്യന്തര ഉപദേശക വിഭാഗത്തിന്റെ നിര്‍ദേശത്തെ തുടര്‍ന്ന് മുന്നറിയിപ്പ് നല്‍കിയത്. മാര്‍ക്കറ്റ്, ആരാധനാലയങ്ങള്‍, മാളുകള്‍, മെട്രോ-റെയില്‍വേ സ്റ്റേഷനുകള്‍ എന്നിവിടങ്ങളില്‍ അതിജാഗ്രതയും കര്‍ശന സുരക്ഷാ പരിശോധനയും തുടങ്ങിയിട്ടുണ്ട്. സംശയമുള്ളവരെ നിരീക്ഷിക്കാനും വാഹനങ്ങള്‍ പരിശോധിക്കാനും പൊലിസിന് നിര്‍ദേശം നല്‍കിയിട്ടുണ്ട്.
ഇംഗ്ലണ്ടിലെ മാഞ്ചസ്റ്ററില്‍ ഉണ്ടായതുപോലുള്ള ആക്രമണങ്ങള്‍ ഉണ്ടായേക്കുമെന്ന വിവരമാണ് രഹസ്യാന്വേഷണ വിഭാഗം ഉയര്‍ത്തുന്നത്. ലഷ്‌കറെ ത്വയ്ബ ഭീകരര്‍ ഡല്‍ഹി, മുംബൈ, രാജസ്ഥാന്‍, പഞ്ചാബ് എന്നിവിടങ്ങളില്‍ എത്തിയിട്ടുണ്ടെന്ന് സംശയിക്കുന്നുണ്ടെന്നാണ് രഹസ്യാന്വേഷണ വിഭാഗം വിലയിരുത്തുന്നത്. ഏത് സാഹചര്യവും നേരിടാനായി പൊലിസ് ഉള്‍പ്പെടെയുള്ളവരുടെ മോക്ഡ്രില്‍ പലയിടത്തും പരീക്ഷിക്കുന്നുണ്ട്.
രാജ്യ തലസ്ഥാനം കേന്ദ്രീകരിച്ച് ഭീകരാക്രമണത്തിന് പദ്ധതിയുണ്ടെന്ന വിവരത്തെ തുടര്‍ന്ന് അതീവ സുരക്ഷയാണ് ഡല്‍ഹിയില്‍ ഏര്‍പ്പെടുത്തിയതെന്ന് ഡല്‍ഹി പൊലിസ് കമ്മിഷണര്‍ അമൂല്യ പട്‌നായിക് പറഞ്ഞു.
ഡല്‍ഹിയിലെ നിര്‍ണായകമായ കേന്ദ്രങ്ങളില്‍ എന്‍.എസ്.ജി കമാന്‍ഡോകളുടെ വാഹനങ്ങള്‍ റോന്ത് ചുറ്റുന്നുണ്ട്. പ്രത്യേക പരിശീലനം നേടിയ ഡ്രൈവര്‍മാരെയും കമാന്‍ഡോകളെയുമാണ് ഇതിനായി നിയോഗിച്ചിരിക്കുന്നത്. വിജയ്ചൗക്ക്, പാലികാ ബസാര്‍, ഐ.പി മാര്‍ഗ്, മാള്‍ ഇന്‍ സാകേത്, വസന്ത് കുഞ്ജ് മാള്‍, സുഭാഷ് നഗറിലെ പസഫിക് മാള്‍, നേതാജി സുഭാഷ് മാര്‍ക്കറ്റ്, മാള്‍ കോംപ്ലക്‌സ്, അക്ഷര്‍ധാം ക്ഷേത്രം, ലോട്ടസ് ടെമ്പിള്‍ തുടങ്ങിയ സ്ഥലങ്ങളിലാണ് കാമാന്‍ഡോകളെ നിയോഗിച്ചിട്ടുള്ളത്.