തിരുവനന്തപുരം: ശബരിമലയിലെ സ്ത്രീ പ്രവേശനം സംബന്ധിച്ച സുപ്രിംകോടതി വിധി നടപ്പാക്കാനുറച്ച് സര്‍ക്കാര്‍. കോണ്‍ഗ്രസും ബി.ജെ.പിയും എതിര്‍പ്പുമായി തന്നെ രംഗത്തുണ്ട്.
കോടതി വിധിയില്‍ പുനഃപരിശോധനാ ഹരജി നല്‍കില്ലെന്നു വ്യക്തമാക്കിയ മുഖ്യമന്ത്രി ക്ഷേത്രത്തില്‍ പ്രവേശിക്കാനെത്തുന്ന സ്ത്രീകള്‍ക്ക് സംരക്ഷണം നല്‍കുമെന്നും പറഞ്ഞു. ഈ മണ്ഡലകാലത്ത് സ്ത്രീകള്‍ അവിടെ വന്നേക്കാം. അപ്പോള്‍ അവര്‍ക്കുള്ള സൗകര്യങ്ങള്‍ ഒരുക്കുക എന്നതാണ് സര്‍ക്കാരിനു സ്വീകരിക്കാനുള്ള നടപടി. ക്ഷേത്രത്തിലേക്കു പോകാന്‍ സ്ത്രീകള്‍ തയാറാകുന്നെങ്കില്‍ അതു തടയാന്‍ പറ്റില്ല. വനിതാ പൊലിസുകാരെ നിയോഗിച്ച് സ്ത്രീകള്‍ക്ക് സംരക്ഷണം നല്‍കും. വേണ്ടിവന്നാല്‍ മറ്റു സംസ്ഥാനങ്ങളില്‍നിന്നുള്ള വനിതാ പൊലിസുകാരെയും ശബരിമലയില്‍ നിയോഗിക്കുമെന്നും മുഖ്യമന്ത്രി പറഞ്ഞു.
സര്‍ക്കാര്‍ റിവ്യൂ ഹരജി നല്‍കണമെന്ന് കെ.പി.സി.സി. പ്രസിഡന്റ് മുല്ലപ്പള്ളി രാമചന്ദ്രന്‍ ആവശ്യപ്പെട്ടു. വിധിയില്‍ സമവായം ഉണ്ടാക്കുന്നതിനായി രാഷ്ട്രീയ പാര്‍ട്ടികളുടെ യോഗം അടിയന്തിരമായി വിളിച്ചു ചേര്‍ക്കണം.
മുമ്പുണ്ടായ പല കോടതി വിധികളും നടപ്പാക്കാതെയുണ്ട്. പിന്നെന്തിനാണ് ഈ വിധി ധൃതിപിടിച്ച് നടപ്പാക്കണമെന്ന് വാശി പിടിക്കുന്നതെന്നും മുല്ലപ്പള്ളി ചോദിച്ചു.
ശബരിമല വിഷയത്തില്‍ ആര്‍.എസ്.എസിനും സി.പി.എമ്മിനും ഒരേ നിലപാടാണെന്നും ഇവര്‍ സുപ്രിംകോടതിയില്‍ നടത്തിയ കള്ളക്കളിയാണ് നിര്‍ഭാഗ്യകരമായ വിധിയിലേയ്ക്ക് എത്തിച്ചതെന്നും പ്രതിപക്ഷ നേതാവ് രമേശ് ചെന്നിത്തല പറഞ്ഞു.
മോദി സര്‍ക്കാര്‍ ഏക സിവില്‍ കോഡ് എന്ന പ്രഖ്യാപിത ലക്ഷ്യത്തിലേയ്ക്കു പോകാനുള്ള കുറുക്കുവഴിയായിട്ടാണ് വിധിയെ കാണുന്നതെന്ന് ചെന്നിത്തല ആരോപിച്ചു. സര്‍ക്കാര്‍ റിവ്യൂ ഹരജി നല്‍കണമെന്നാണ് ബി.ജെ.പിയുടെ ആവശ്യം.